DIMIS MIMEZLE 1 - Bible en langue guiziga

¹ Hana i dimis mimezle wãˀ ngi Salomoŋ.

Ngwas ati zil. Bubuɗ ngi mangaslay Ngwasa

² Jiy kuɓuy so, curɓiy mi ko mbak le ta, asi wuɗa vu ɗike, a wiy duwlak fineˀ mbaazla,

³ i mezle fineˀ zĩˀĩ ngi urdi ɗikey na. Deŋ ɗike, naŋ ka urdi mipal naŋ kine mazĩˀĩ ndum. Diilihey mawuɗokuw haɗa na vurˀe.

⁴ Jiy haŋ kaw, kulukum cuwa. Buy ɗu ci ti ya nga viŋ ɗiki. Juɗukum mececẽleŋ, mumulukum asi mezle ɗik na. Gukum muguzlum ngi wuɗa vu ɗik mundum fineˀ mbaazla na. Ziri mongosohoy mawuɗam ka haɗa na, naŋ kaslsla.

⁵ Kum diili Zeruzalemey, ya kakayak kakayak ɓula, amma yi diili mukuy, ya kakayak kakayak kaɓa guɗuk a Kedar, kaɓa godo hirngahay.

⁶ Ki jam lesl vur ya mikakayak kakayak na ta, i pas mulusiy kanah. Sukum ɗuwoy a jam mevel le ar ya, a cifikiy ɓa yi jigin guva ngi gudubun, amma kuy ngi vu ɗu, yi jigina ta.

⁷ Ka mbur ngi si mevel ɗu wãˀ, inga bigiy li ka majigina ginew ɗik mitaˀ gezleŋ, li ka mamusuk vu ti taŋ ti wuzla papas na. ɓa y'anta rudigi kiŋkiŋ lambaˀ ngir ti ciki ginew ngi ngama ɗikey ta.

Mbur mizile

⁸ Ka mukuy teˀ ngi wuzla ngwasay, da ka, ki si na ta na, bi, sipa baraf ngi tumuŋhoy, pula ziri ˀaw ɗikey a zumam aciki hay ngi mijigineye.

Mbur mizile

⁹ Ka yeme ɗu, ka njikimaˀ ka jagara pilis mujuwa le da mota ngi vurum ngi buy madiɗa ngi Ezipte.

¹⁰ Kwala ɗik a pur fetek fetek tisi ngwic hirnga ɗik muslupa na, ˀay ɗike ndat ti virzle ɗikeye.

Mijiginey

¹¹ I sa vuɗukuw gwat ngi slimiɗeye ti ɓiri tapasl tapasl, waɗ ti ɓiri bara.

Ngwasa

¹² Buyo, da naŋ mira zum ɗaf ngi muguzlum na, urdi ngi nardi ngivi vu ɗu a zĩˀĩ jirre.

¹³ Mikiɗa may ɗu nga ya, naŋ kaɓa gojogoɗ ngi urdi mazilaka mir, a hin gumbuˀ a didak ɗu.

¹⁴ Mikiɗa may ɗu nga ya, naŋ docok kaɓa yi ngi widis hene a wuzla guva ngi gudubun a En-Gedi.

Zil

¹⁵ Yeme ɗu, kay, ka kuy teˀe, kay, ka kuy teˀe! Hiri ɗike sleɗeɗe ka gonoko!

Ngwasa

¹⁶ Kay, ka kuy teˀ, mikiɗamay ɗu, kay, ka kuy teˀe! Gwat ngi hin ndra kuluf kulf ka kalaf tukuzoŋ!

¹⁷ Hay ndra i miɗiya ti mbal ngi dum ngi miter, baburum ndra i miɗiya ti dum ngi migidaŋ mimezle.