DIMISEY 97 - Bible en langue guiziga

Bumbulvuŋ i buy madiɗaŋ, mumul asi ruwuyo gar

¹ Bumbulvuŋ i buy madiɗaŋ, anja hirwuy kurzluˀ gar a jiɗ mececẽleŋ, anja hirwuy maturahay gar misi ar mubuliyeye, a mumulom!

² Luvuŋ ati gazlavay gun hirnga ngi naŋhay, gi jeŋŋe ati gi kaslsla, i gidaŋ ngi zumabuy naŋ.

³ Vu ara ru ɓaˀ a mbuŋ naŋ, ara zuma mizli mazliram ti naŋ tahay mugun hirnga naŋ na gar.

⁴ Wucuɗ naŋ misi ka vuŋ na, a pusluɗa duniya ciɗak ciɗak, hirwuy mupura keɗ na, a jijik ngbir ngbir.

⁵ Muwãhay a luwuslam ka tebeɗ a mbuŋ Bumbulvuŋ, a mbuŋ Bumbulvuŋ miwa hirwuy keɗeɗe.

⁶ Jeŋŋe naŋ na, muŋ a til di mi le, yo mizli gar a puraka dudok naŋ le.

⁷ Mizli gar mahuruk hurukam a mbuŋ kuliheye, ara pam mesem. Kum mizli majijaham asi gwat ngatarahay lambaˀ, yo kum kulihey gar, hurkom huruk huruk a mbuŋ Buymisemuŋ.

⁸ Bumbulvuŋ, mizli Siyoŋhoy micinaka ɓi nah na, a mumulom, yo walahay madiɗa madiɗa ngi si ruwuy Zuda, ara jiɗam mececẽleŋ, asi kiitaka masla na.

⁹ Asi mike na, ka Bumbulvuŋ, ka Mifineˀ gwat ngi si ruwuyoy gar na, mawo kulihey gar baɗ a muŋ i kaha!

¹⁰ Kum mizli mawuɗam Bumbulvuŋ na, puraka ɓi malambaˀa hiris le, Buymisemuŋ ara jigina siifa ngi mizli miteŋteŋ naŋhaya, ara laha taŋ tisi haŋ ngi miziriɗa mi naŋhaya.

¹¹ Li minjahha a ro ciɗak ciɗak ar mbur mijeŋŋe, mizli misi mevel purlahaya, ara mumulom.

¹² Kum mizli mijeŋŋehey, mumuloko Bumbulvuŋ, yo hunumakaŋ ti zila slimiɗ naŋ mipal na.