DIMISEY 94 - Bible en langue guiziga

Gwat migi le jeŋ ta na, Buymisemuŋ a pula bol nah

¹ Aw Bumbulvuŋ, ki Buymisemuŋ ɗu mapul bol! Buymisemuŋ ɗu mapul bol, inga bugo vu so.

² Ka, migi kiita ngi mizli gar, slikiɗ takwa, mizli mahuhumom vu taŋ na, wurka taŋ ti bonoy.

³ Bumbulvuŋ, miziriɗa mi ɗikeye, t'ada a ndiram hã ti vunaka? Haˀaw, t'ada mbak i bugawlahaya si hã ti vunaka?

⁴ Mizli migi gwat malambaˀ tayna gar, ara huhumom vu taŋ, ara ɓam mi duzloˀ duzloˀ lambaˀ, waɗ a gam wuya.

⁵ A ra guzuvuraka mizli ɗikeye Bumbulvuŋ! A ra tikaka ˀay da mizli ɗikeye cunuˀ cunuˀu.

⁶ A ra ngizlaka wudiga ati moholoyoyo, ara kiɗaka mutuhuhoyo vagay vagay.

⁷ Taŋ a ɓam na: «Ka Bumbulvuŋ, k'anta pura taŋ ta, ka Buymisemuŋ ngi Zakopo, k'anta si na ta kini!»

⁸ Haya kum mizli gilaw muwãˀ naŋhay, sinaka sin le, kum mizli manja lesley, kisa slaka wala ngi ɓi hã ti vunaka?

⁹ Miga slimiɗ ngi mburo, i Buymisemuŋ ma na, naŋ anta cin ta mbri mbri maka? Miga hiri ngi mburo, i naŋ ma na, naŋ anta pur ta mbri mbri maka?

¹⁰ Mukuta sukwi mekelemey i naŋ, a kuti vu ti bonoyo gu ta kwa? I naŋ muvula sin naŋ da mburo,

¹¹ gwat ngi gi, mbur mujuwa le a mevele na, Bumbulvuŋ a si na le, i ngatara lambaˀ.

¹² Bumbulvuŋ, mbur ka mira kutaŋ, yo ka mira dubunaŋ ɓimujuwa ɗik na, kay, a mumul.

¹³ Ti hin ngi bonoyo, kisa ga ɓa a sa ndir jam jam gwat naŋ, amma ara lam vigiɗ vur miziriɗa mi ɗikeye cici.

¹⁴ Asi Bumbulvuŋ anta pula mizli naŋhaya ta, mizli nga naŋhaya, naŋ anta mbuka taŋ zlaɗ ta.

¹⁵ A sa gaka kiita jeŋ jeŋ muduba, yo mizli misi mevel mileɗeɗeheye, a sa sipaka kanah.

¹⁶ Aw, masa cik vu angi ya avu mizli misi moˀore tayna i wa ska? Masa jiniˀis asi ya avu mizli malambaˀ tayna i waka?

¹⁷ Da Bumbulvuŋ a kilo widi ɗu zleˀe ta na, anja ani i ro gweˀ ng'ar li ngi mizli mumucahay.

¹⁸ Da ya miɓi le zleˀe: «I cici deŋ gu na mata,» gi teŋteŋ ɗik ara jihiy jah gidaŋ gidaŋ, Bumbulvuŋ.

¹⁹ Yo da ya mira lik fineˀ gidaŋ zleˀe na, ki ra tisliy mevele.

²⁰ Migi kiita, migi gwat malambaˀ tayna, gwat mujumukum ati t'ada kwa? A ra soko ti bonoy ng'ar mizli, asi ara puraka ɓimujuwa hiris le.

²¹ A ra jiginam mi avu mizli mijeŋŋeheye, mbur migi gwat ta si na, a jakaŋ ti kiita si.

²² Amma Bumbulvuŋ a tiri le i li ɗu muguno ti mohol, Bumbulvuŋ ɗu i gidigil muwã ya maɗum aseˀeŋ.

²³ A mbiɗa gi gwat malambaˀ taŋ na le nga hirnga taŋ tehhe a muŋ, a ngizla hilfa taŋ le kap wãˀ ti moˀore taŋ vuna tehhe a muŋ, Bumbulvuŋ ndra, Buymisemuŋ, a ngizla hilfa taŋ le kap wãˀ.