DIMISEY 92 - Bible en langue guiziga

Naŋ kuy ɓa ngi hunumuw Buymisemuŋ

¹ Dimis ngi zli tapas hin ngi Sabat.

² Naŋ kuy ɓa i gukuw muguzlum Bumbulvuŋ, yo ɓa i hunumukuw ti dimis, ka Buymisemuŋ Mimadiɗa!

³ Ɓa i tilam mi ti ɓi ngi wuɗa vu ɗike, zle ti mipriki, yo kap ti duvuɗo, i tilam mi ti gi teŋteŋ ɗiki,

⁴ i gaka ti kiɗa kããku ati gujuvur, waɗ ti kiɗa garaya.

⁵ Asi slra ɗike, ara vuliy mumul Bumbulvuŋ! yo i ra juw salalay vur slraka miga taŋ.

⁶ Bumbulvuŋ, slraka miga taŋ na, i slra madiɗahay, yo wuluk ɗike, naŋ jileŋ haɗa!

⁷ Mbur gilawa, a si na gwat nah neˀ ta, mbur misi wuluk duguleˀ na, anta sla wala naŋ neˀ ta.

⁸ Da misi moˀoreheye, ara gilam ka giziŋ, da migi gwat malambaˀhaya, a roko ti vu taŋ zuy zuy tekeɗe kwana, i ngi kiɗa mi wãˀ ngi set na si.

⁹ Amma ka, k'ada a muŋ a diga, ki Bumbulvuŋ hã ngi set.

¹⁰ Bumbulvuŋ, pura mesene ɗikeye, pura taŋ ayɗi, a sa zizam, yo migi gwat malambaˀhay gar na, a sa zliɗam hirnga mber mber!

¹¹ Ki vuliy gidaŋ ngi mbana le, ki piy urdi le ng'avu vu.

¹² Hiri ɗu a ro taˀ ar mizli majiɗikiye, yo misi moˀorehey mazlikiy ngi kiɗa vu na, i ra cine ˀay taŋ.

¹³ Mbur mijeŋŋe a gil laɓ laɓ kaɓa dibinoje, a ki haŋ ɓaˀ ɓaˀ kaɓa miter ngi ruwuy Libaŋ.

¹⁴ I widis mikaˀ a hay Bumbulvuŋ, ara gil kaˀ a mamay Buymisemuŋ ndra.

¹⁵ Ko da a gi madangwas le kwana, ara yi, yam ava, yo kalaf ava aruŋ na si.

¹⁶ Bumbulvuŋ naŋ kaslsla na, mabiga ani: «I gidigil muwã ɗu. Ɓi musloh kini sloh kini anta ava ta!»