DIMISEY 90 - Bible en langue guiziga

DEREWOL MUMUFAƊ NAŊ ( Dim 90—106 ) Mbur a kiɗ mi, Buymisemuŋ a ndir ngi sete.

¹ Dira dibiɗ ngi Moyis, mijiviɗ ngi Buymisemuŋ. Bumbulvuŋ, diga zlezle, hã ngi set gar na, ka ki li pula vu ndra.

² Ti muwãhay mubugoko vu t'aruŋ, yo ti ka miga duniya t'aruŋ na, naɓa ka ki Buymisemuŋ diga zlezle, hã ngi surmut.

³ Ki mi ti mbur titira ng'ar murɓuk a muŋ, asi ki ɓaŋ na: «Mi ng'ar li ɗik ka mubo ti raˀa na a muŋ!»

⁴ Vi durmuk avu ka, naŋ gek kini, naŋ kaɓa hin mucuh le ngi daambu, mallakaɓa ler purla ti duvuɗu.

⁵ Ka mazuɓa siifa ngi mizli na, naŋ kaɓa hinje minjeffe, siifa a kiɗ mi kutum kaɓa giziŋ ti miprik a ɓuh.

⁶ A fuyuk ti miprike, a gil, ti pastaˀ na, a ɓut, a muˀul.

⁷ Haˀaw, himaˀ ɗik a ngizla ndra le kap wãˀa, ji mevel ɗike, a jijika ndra le kirkir haɗa.

⁸ Ki bo ti malambaˀ ndraˀahaya le cikislaɓ ar li babara a mbuŋ ɗike, ɓi miyaŋŋa ndraˀahaya, t'ani ngbay a mihiri ɗike.

⁹ Ka miji mevel le na, hin ngi siifa ndra a mo duguleˀe, hin ngi siifa ndra kwana, a cuh kaɓa musuwun fẽh purla.

¹⁰ Vi kukur tarnaˀa, i zik ndra angi siifa, malla ngi mizli migidaŋ gidaŋhaya, vi kukur dangafaɗa, amma ndra malumam anga na, sey i gir ati bonoy tewle, vi a cuh kutum, i micam.

¹¹ Ji mevel ɗike, mbur masina gidaŋ naŋ gu i waka? Da mbur ara cunuw mi haɗa na, a si na ji mevel ɗike.

¹² Dubuna ndra slufa hin ngi siifa ndra, ɓa i lumam ɗik sin mijileŋ a mevele.

¹³ Bumbulvuŋ, kisa pula ji mevel ɗik ar ndra, hã ti vunaka? Mo ng'avi ndra, pura ndrˀircece da ndra gawla ɗikeye.

¹⁴ Zle ti miprik si na, ga ndra mezle ɗike haɗa, ɓa i sa jam salalay ar siifa ndra wãˀ.

¹⁵ Hin ka mukuta ndra ti bonoyo, mbiɗa ndra di hin ngi mumul, vi ndra mulumam gireye, mbiɗa ndra di vi ngi mumul.

¹⁶ Anja ndra gawla ɗikeye, i puraka slra ɗik ka maga na, yo anja dideˀ ndrahay a puraka kuy ɗik mazli ta na.

¹⁷ Bumbulvuŋ, Buymisemuŋ ndra, ga ɓa i ndiram teˀ teˀ kaɓa ka, ga ɓa slra ndrahay a ndiram i slra midar daray, haˀaw, ga ɓa slra ndrahay, a ndiram i slra midar daray.