DIMISEY 9 - Bible en langue guiziga

Bumbulvuŋ, milaha misi murgahay ati muguzuvurahay

¹ Dimis ngi wuzla dimis ngi Davitey. I mulumo di ar ɗerewol buy dimis. A zlaka ti ˀay miɓel ɓel.

² Bumbulvuŋ, i hunumuw ti mevel ɗu wãˀ, i ɓa ɓi ngi gwat ngi zuma hirngahay ka miga taŋ gar.

³ I ra zluzluɓ haɗi mbele ka, yo i ra zli dimis ti slimiɗ ɗiki, ka Bumbulvuŋ Mimadiɗa.

⁴ Mesene ɗuwoyo, ara mam ngir ti dirba, a ram tiɗam tiɗam, yo ara zizam a mbuŋ ɗike,

⁵ asi ki cik vu le ar ya, ɓa i luuma hirnga ɗu, waɗ ɓa ɓi ɗu a ndir jeŋŋe. Ka migi kiita mijeŋŋe, ki ro ar janga ɗik ngi buyoy.

⁶ Ki guco mi le da sukwi ngi mizli ngi si ruwuyoyo, mbur miteŋteŋ ta na, ki ziza le, ki susuyumo slimiɗ taŋhaya le ngi wãˀ.

⁷ Ki kiɗa hilfa ngi mesene le, ki ziza le ngi wãˀa. Ki ngizla walahay madiɗahaya le, wuluk naŋ keŋ a hirnga anta mata.

⁸ Amma Bumbulvuŋ, a ro ar zumabuy naŋ ngi sete, a ro joˀ gidaŋ gidaŋ ar janga naŋ ngi buyo, ɓa ngi gi kiita.

⁹ I naŋ majigina duniya jeŋ jeŋ, yo a ga kiita da mizli kasl kasla.

¹⁰ Anja Bumbulvuŋ a ndir i li ɗum ngi mbur muguzuvuraŋ, li ɗum naŋ ar hin ngi bonoy!

¹¹ Mizli misinaka slimiɗ ɗik na, anja a njaham hiri vur ka, asi mizli masupukuw na, k'anta pula taŋ fuk ta Bumbulvuŋ!

¹² Bumbulvuŋ mua Siyoŋ, hunumukum di ti dimisi. Gwat madiɗahay, naŋ miga taŋ na, tilam taŋ mi a wuzla sukwi ngi mizli gar.

¹³ Asi naŋ ara cufuɗa gwat ngi gi ngi mizli mikiɗa hirngahaya, a si na gwat taŋ migaka le, anta puyuk hirnga ti mizli migeˀ ircecehey matilakaŋ mi na ta.

¹⁴ Puriy ircece Bumbulvuŋ! Pura, mesene ɗuwoy a tikikiy ˀay le, i ka maɗiɗo ya baɗ tisi haŋ ngi muco,

¹⁵ ɓa i hunumuw hunumoyo gar, deŋ a wuzla mizli ngi walahay Siyoŋ, yo ɓa yi zluzluɓ asi ka malih vu.

¹⁶ Mizli ngi si ruwuyoy gar a ndilam le ng'ar vigiɗ, taŋ milaka ti haŋ taŋ, a caka sara le ng'ar zuva, taŋ ming'aka ɗum zleˀe.

¹⁷ Bumbulvuŋ ara bugo vu, ɓa mizli a sinakaŋ, a zla kiita le, mbur miteŋteŋ ta na, a jaŋ ti kwar naŋ tehhe a muŋ.

¹⁸ Anja mizli miteŋteŋ tahaya, a mam ng'ar li ngi mizli mumucahay a muŋ, sukwi tayna cek, a puyukom hirnga ti Bumbulvuŋ le.

¹⁹ Ĩˀĩ, Bumbulvuŋ anta sa puyuk hirnga ti mbur misi murga ta ndiɗaˀ. Mizli migeˀ irceceheye, wuluk taŋ mitaˀ ar Bumbulvuŋ na, anta zizi ta ndiɗaˀ wãˀa.

²⁰ So jiniy Bumbulvuŋ! Anja mbur titira a lum bugawla ta! Anja a gaka kiita da sukwi ngi mizli a mihiri ɗike!

²¹ Bumbulvuŋ, ga taŋ zluwun haɗa, ɓa sukwi ngi mizli a sinaka, taŋ i mizli mamicam.