DIMISEY 86 - Bible en langue guiziga

Ar bonoy ɗu, i hiziga widi ng'avi ka

¹ Dira dibiɗ ngi wuzla diradibiɗ ngi Davitey. Bumbulvuŋ, jiko slimiɗ ng'avi ya, ya madiruw dibiɗ na, mbiɗiy di takwa, asi yi mbur migeˀ ircece le, yi misi murga ma.

² Ya mbur miteŋteŋ ɗike, cik vu ar ya. Ka Buymisemuŋ ɗu, ya gawla ɗik manjih hiri asi ka na, lihiy.

³ Bumbulvuŋ, puriy ircece, ya mazil vur hin gar na, i kaha.

⁴ Bumbulvuŋ, ga ɓa ya gawla ɗike, i mumul a mevel ɗu, asi mike na, ya madir dibiɗ gar na ng'avi ka.

⁵ Bumbulvuŋ, ki mbur mezle haɗa, yo ki pul mungra ma, mizli matumbulukuw gar na, ki vula taŋ gwata ti gula ti hazum.

⁶ Bumbulvuŋ, jika slimiɗ asi diradibiɗ ɗu na takwa, ya matumbuluw na, ambuh ciniy di.

⁷ Da bonoy mulumiy le na, yi kuw zil, joˀ ki mbiɗiy di.

⁸ Bumbulvuŋ, a wuzla gwat mizli mahuruk hurukam avu taŋ gar na, munduluw ka anta! Gwat ka maga gar na, ko ngi wa ati naŋ anta.

⁹ Bumbulvuŋ, sukwi ngi mizli, ka miga taŋ gar na, a sa hurukom huruk huruk a mbuŋ ɗiki, a sa gukuw dudok ti zila slimiɗ ɗike.

¹⁰ Asi ka, ka madiɗaŋ, ki ra gi cekenehey, Buymisemuŋ i ka pal ɗiki.

¹¹ Bumbulvuŋ, bigiy jiviɗ ɗike, ɓa i sa sipa ɓi mikaslsla ɗike. Ga ɓa i ndir ti mevel purla tewle, mevel ngi zluwun ti ka.

¹² Bumbulvuŋ, Buymisemuŋ ɗu, i hunumuw ti mevel purla, yo i guw dudok ti zila slimiɗ ɗike ngi caˀa.

¹³ Asi gi teŋteŋ ɗik vur ya na, naŋ haɗi wãˀ, yo ki tuɓo ya le tir li mijileŋ ngi mizli mumucahaya.

¹⁴ Aw Buymisemuŋ ɗu, mizli mahuhumom vu taŋ na, a zlikiy le ngi kiɗa vu, sukwi ngi mizli misi moˀoreheye, a wuɗam kiɗ ɗu vagay, ko ɓi ɗik a ca taŋ neˀ mata.

¹⁵ Amma ka so na, Bumbulvuŋ, ki Buymisemuŋ, mapur ircece, yo misi mevel mezleŋ, maji mevel kutum ta, ka teŋteŋ haɗa, yo kakaslsla ma.

¹⁶ Mbuɗo hiri ngir tivi ya, puriy ircece ayɗi, ya gawla ɗike, vuliy gidaŋ ɗike, lihiy, ya mangal ngi ngwas beke ɗike.

¹⁷ Ga gwat mabiga gi mezle ɗik avu ya na, ka Bumbulvuŋ, makulo widi ɗu, yo matikiniy ɓa i taˀa tuwuy na, da mesene ɗuwoy misa puraka le na, a sa pam mesem.