DIMISEY 81 - Bible en langue guiziga

Kay, da mizli ɗuwoy a cinikiy mi le zleˀe na…!

¹ Dimis ngi wuzla dimis ngi Asafay. I mulumo di ar ɗerewol ngi buy dimis. Dimis ngi gujuvur ngi hirwuy Gat.

² Zluzluɓam a mbuŋ Buymisemuŋ, mavula ndra gidaŋ i naŋ, jam salalay da Buymisemuŋ ngi Zakopo.

³ Kiɗam gwat ngi dunguroy, kiɗam badak, kiɗam garaya matuwuy kuy teˀe, waɗ gujuvur.

⁴ Kiya muslo le wureˀ na, fam tulum, vur hin ngi muguzlum ndra, waɗ fam ti kiya babara ma.

⁵ Nah na, i ɓimujuwa vur Israyeley, i Buymisemuŋ ngi Zakop mujuwa ɓi nah,

⁶ I jiviɗ naŋ muɗuva da Zozef, ɓa a sipaŋ, ti di naŋ mibi nga gi vurum ati hirwuy Ezipte. I cin ˀay ngi mbur ya misina ta, a ɓiy:

⁷ «I zuɓuw gwat ngi jijir ngir gagalaˀay ɗike le avra, ki muɗa haŋ ɗike le avu gwat mududoko.

⁸ Ti ka mawidi zleˀe ti bonoy ɗik na, yi lihuw le, ti ya muɗum a hur burkataŋ gambara na, yi ziluw mi le. I ci le a kwacay ɗik a mi yam Meriba.

⁹ Mizli ɗuwoy, cinam ɗagay, mingiɓi ɗu ani ngi kukum mumuyuŋ zay sla a slimiɗe! Kay Israyel, cinikiy mingiɓi ɗu so!

¹⁰ Buymisemuŋ mekelem a hay ɗike mbak ya le na, anta, Buymisemuŋ mekelem pal, ɓa ki huruk a mbuŋ naŋ na, anta.

¹¹ I ya Bumbulvuŋ ɗik, Buymisemuŋ, mubo ti ka tir hirwuy Ezipte. wuna mi wun kuy kuy, ɓa i vuluw gwat ngi zum.»

¹² Amma mizli ɗuwoy a ngumam cine mingiɓi ɗu ta, Israyeley a wuɗam ɓi ɗu ta.

¹³ Dar yi pula taŋ mbak da hirnga taŋ migidaŋ na, ɓa a gam gwat taŋ majuwaka a mevel taŋ.

¹⁴ Kay! Da mizli ɗuwoy a cinikiy mi le zleˀe na, da Israyeley a sipaka jiviɗ ɗu le zleˀe na,

¹⁵ anja ani i tikaˀay le zlezle da mesene taŋhaya, yo anja i kiɗa mizli maguzuvuraka taŋ na le.

¹⁶ Akẽh na, mesene ngi Bumbulvuŋhoyo, a sa pulaka jijih a mbuŋ taŋ wãˀ, yo Israyeley vuna, a sa pulam vu wãˀ.

¹⁷ Ya Buymisemuŋ, i sa vula taŋ alkamari mimezle ngi zumo, yo i sa vula taŋ mam, hã a ɓula taŋ mi.