DIMISEY 77 - Bible en langue guiziga

Ar bonoyo, i wulka ɓi ngi gwat ngi zuma hirngahay, ka miga taŋ zlezle zleˀe na

¹ Dimis ngi wuzla dimis ngi Asafay. I mulumo di ar ɗerewol ngi buy dimis. A zlaka vur Yedutuŋ.

² Ya mazil na, i Buymisemuŋ gawlay, ya matuwuy na ng'avaŋ. Ya mahiziga widi na ng'avu Buymisemuŋ, ɓa a ki slimiɗ ar ya.

³ Da bonoy mulumiy le na, i mbiɗi hiri ng'avu Bumbulvuŋ. Ti duvuɗo, haŋ ɗu a ro tille ng'avaŋ, ko mbak le anta. Y'anta ngum a tikinikiy, i taˀa tuwuyo ta.

⁴ Da ya muwulka Buymisemuŋ le keŋ sina, dar i niˀic, ya muwuluk le na, y'anta i si na ɓa i ɓi kini ta.

⁵ Buymisemuŋ, k'anta ngum ɓa i tiɗa hiri ta, kay, a giy gigisl le, i si na ɓa i ɓi kini ta.

⁶ I ra wulka hiney mucohom zleˀe, waɗ vihey mucohom zlezle zleˀe.

⁷ Ti duvuɗo, dimis ɗu a so keŋ a hirnga, i wuluk a mevel ɗu, i ɓi ti kwacay ɗu:

⁸ Bumbulvuŋ a puliy ya mbur naŋ fuk wãˀ sukwa? A wuɗ ya mata wãˀ sukwa?

⁹ Gi teŋteŋ naŋ na, anta mata wãˀ sukwa? A ɓi mata wãˀ, hã ngi set sukwa?

¹⁰ Buymisemuŋ a ga ndra mezle mata, a puyuk hirnga le wãˀ sukwa? Naŋ miji mevel na, anta wuluk ar ndra mata sukwa?

¹¹ Joˀ yi ɓi: «Gwat magiy kuyta vuna anihĩ: Mimadiɗa, anta ga gwataka misi zleˀe mata.»

¹² Gwat madiɗahay, Bumbulvuŋ miga taŋ na, yi ra wulka taŋ keŋŋe a hirnga, haˀaw, cekenehey ka miga taŋ zlezle zleˀe na, i ra wulka taŋ keŋŋe a hirnga.

¹³ Gwat ka miga taŋ gar na, i ra wulka taŋ a kwacay ɗu, i ra wulka gwat madiɗahay ka miga taŋ na.

¹⁴ Haˀaw Buymisemuŋ ɗu, slra ɗike naŋ pal kine. Ka ki Bumbulvuŋ madiɗa, misi kaɓa ka ada ma kwa?

¹⁵ Ka ki Buymisemuŋ magi cekenehey, ki biga gidaŋ ɗike le da sukwi ngi mizli.

¹⁶ Ki loho mizli ɗikeye le ti gidaŋ ɗike, mizli ɗikey, ziri ngi Zakopoy ati ngi Zozefey.

¹⁷ Haˀaw Buymisemuŋ ɗu, yamay mupurukuw le keɗ na, a zluwunam, hã a jijikam kasl asi virzi taŋ.

¹⁸ Gazlavay a po yam, hã mekepel a zuɓ, Vuŋ a wucuɗ pak pak ɓaˀ li gar, a hiziga ndisl.

¹⁹ Ka miga le, ɓa vuŋ a ndisl, a cin nga mbuŋ nga mbuŋ na, wucuɗ naŋ a pusluɗa duniya cay ar li babara, Hirwuy a wus, a jijik ngbir ngbir.

²⁰ Ki ka jiviɗ ngi ru ɗike ɓaˀ a wuzla mubuliye, li cuh ɗik ada angi yam mijileŋ jileŋheye, amma ko mbur mapura baraf ɗike gu anta.

²¹ Ki zuɓa Moyis ati Aroŋ ɓa a ram ti mizli ɗikeye, kaɓa mijigin maru ti ginew naŋhay.