DIMISEY 71 - Bible en langue guiziga

Ki puliy ta Buymisemuŋ, wurenna i ra gi gal

¹ Bumbulvuŋ, ki li ɗum ɗu, ki puliy mesem mesem ta.

² Ka mijeŋŋe na, lihiy, cuko ya, jiko slimiɗ ng'avi ya, yo lihiy.

³ Anja ki tiri gidigil muwã, ya macifi aseˀeŋ, li ya maru ng'ara avu ya muwuɗ le: ki wuɗ le ɓa ki lihiy. Haˀaw, ki gidigil muwã ɗu, li ɗu muguno ti mohol.

⁴ Buymisemuŋ ɗu, lihiy tisi haŋ ngi mbur misi moˀore, tisi haŋ ngi migi mungra madiɗahay ati muguzuvura vuhoyo.

⁵ Ya maɗuva wuluk taˀ na, angi ka Bumbulvuŋ, Buymisemuŋ, i puluw mevel ɗu le, diga ya misi ti zuŋ.

⁶ Diga taŋ miyikiy cak si na, i ro jahha ti ka, ani mubo ti ya ti kwacay maha i ka. Ya mahunumuw ndrehhe nakaslsla!

⁷ Mizli haɗa a purikiy kaɓa mbur mupuraka ɗaˀ ta, ki li ɗum ɗu migidaŋ gidaŋ.

⁸ I ndir ti hunum ɗike ndrehhe avu mi, i ngil wuy ti kuy ɗike vur hin gar.

⁹ Ki puliy ta, wurenna i gi gal le, da gidaŋ ɗu ara tiki na, ki puliy ta.

¹⁰ Asi mesene ɗuwoy ara ɓam ar ya, mizli majiɗikiy a jumomˀay le ar ya.

¹¹ A ɓam: «Buymisemuŋ a pulaŋ le fuk, gidiɗakaŋ, joko di, ko mbur masa tiɓaŋ anta!»

¹² Aw Buymisemuŋ, ki kirih kileŋ avu ya ta, Buymisemuŋ ɗu, so jiniy kutum!

¹³ Mizli mawuɗam zizi ɗu na, anja mesem ara ziza taŋ nga kẽh! Anja mizli mawuɗam ɓa mendere a lumiy na, anja zi ati mesem a sirta taŋ!

¹⁴ Yi ro hiri njah ndrehhe asi ka, yo i ro hunumuw hirdam hirdam ti dimisi.

¹⁵ Ɓi ngi jeŋŋe ɗik ati ka malih vu na, i ndir di ndrehhe avu mi, gi mezle ɗik anta sluf ta wãˀ.

¹⁶ I sa ci ngi hay ɗike Bumbulvuŋ, Buymisemuŋ, mbele ka micici ar ɓi ɗu, i sa ɓi di i ɓi ngi gi jeŋŋe ɗik tewle.

¹⁷ Aw Buymisemuŋ, ki dubuniy gwataya le diga ti zuŋ, hã wurenna, i ra til mi ti ɓi ngi gwat ngi zuma hirngahay ka miga taŋ na.

¹⁸ Aw Buymisemuŋ ɗu, wurenna i gi gal le, yo ya hol tullo. Gar ti nah kwana, anja ki puliy fuk ta: dar i sa til mi ti ɓi ngi slra ngi gidaŋ ɗike da mizli migwene hanayna, yo wirwir ɗike, i sa til di mi da ziri masa ya ka taŋ nga mbuŋ.

¹⁹ Buymisemuŋ, gi jeŋŋe ɗike, a zuɓ hã a dadala muŋ! Ki gi gwat madiɗahay le haɗa, Buymisemuŋ, mbur misi kaɓa ka vuna i waka?

²⁰ I lum bonoy ati gwat mukuy tahay le haɗi asi ka, amma ki ra vuliy siifa a muŋ, Ki ra bo ti ya ti hur zivi a muŋ.

²¹ Ki ra ɗuviy hirnga muŋ, yo ki ra tikiniy ɓa i taˀa tuwuy a muŋ.

²² Dar yi hunumuw ti gujuvur, Buymisemuŋ ɗu, i zluw dimis asi gi teŋteŋ ɗike. I sa kuɗuw kããku da ka Buymisemuŋ mipal ngi Israyel.

²³ I sa kiɗ gwat ngi dunguroy asi ka, i sa juw salalay ti irne ɗu, asi ka mumbuɗo hirnga ɗu na.

²⁴ Irne ɗu a sa ɓa ɓi ngi gi jeŋŋe ɗike vur hin gar. Naŋ kine, mizli mawuɗam ɓa mendere a lumiy tuwa na, t'ani ndar ndar ti mesem waɗ zi.