DIMISEY 7 - Bible en langue guiziga

Bumbulvuŋ, giy kiita ɗu.

¹ Dimis ngi bonoy ngi wuzla dimis ngi Davitey, Davit a tuwuy a mbuŋ Bumbulvuŋ vur mbur manja sin, Kus mbur Benjamiŋ.

² Bumbulvuŋ, Buymisemuŋ ɗu, ki li ɗum ɗu, lihiy, yo tiɓiy avu mizli masipikiy nder ndere.

³ Da kanah ta na, a sa slikiy ˀay, yo a sa puwikiy, kaɓa moboroy mapuwam gwat, ko mbur mitiɓi ɗu anta pal ta.

⁴ Bumbulvuŋ ɗu, Buymisemuŋ, da i ga gwat mizli maɓaka na le, da i gi mungra le mukuyta wãˀ,

⁵ da i gi malambaˀ le da mbur ndra mucuwa mbak mesene ɗu a sumuɗ jak na,

⁶ anja mesene ɗu a ɓuliy, a jiy, a kurpiy titiri ɓaˀ a ruwuy, yo a putukuliy ar mereɓ jom ti vu ɗu ya mahuhum di vu na!

⁷ Bumbulvuŋ, slikiɗ ti mevel! Tika himaˀ ngi mesene ɗuwoyo! Maɗuva ɓimuɗuva mitaˀ gar i ka, jiginiy deŋ a ciki ɗu.

⁸ Anja sukwi ngi mizli a cikilam gun hirnga ɗike: yo ka wo taŋ baɗ tir li zumabuy ɗik a muŋ!

⁹ Bumbulvuŋ a ga kiita da mizli ngi si ruwuyoy gar. Bumbulvuŋ, giy kiita ɗu weˀe avu gi gwat ɗu mijeŋŋe, yo avu ya mici ar ɓi ta na.

¹⁰ Anja kuw ngi misi moˀorehey a wi mi! Vula gidaŋ da mbur mijeŋŋe! Asi masina mevel ati hur kwacay ngi mburo, i ka Buymisemuŋ mijeŋŋe!

¹¹ Mbaray ɗu i ka Bumbulvuŋ milaha misi mevel purlahay.

¹² Buymisemuŋ i migi kiita mijeŋŋe, i Buymisemuŋ mazuɓ himaˀ vur hin gar.

¹³ Da mesene a mbiɗa mevele ta na, a mbisa maslalam naŋ, a hila leke hoc, yo a wi vu weˀ.

¹⁴ A ɗiya gwat ngi kiɗa vuhoyo ɗiyeˀ ɗiyeˀ le, weˀ taŋ vu, waɗ luvutoy ngi nduvuɗa vu a mi taŋ.

¹⁵ Mbur muro ti wuluk ngi gi mungra madiɗa, yo majijir ti malambaˀ a kwacay naŋ na, a yi slir.

¹⁶ Mbur mali vigiɗ, a guro jileŋ na, a diɗ ng'ar vigiɗ naŋ mila vuna tehhe a muŋ.

¹⁷ Mungra madiɗa naŋ mawuɗ a ga tuwa na, a mbiɗi ng'ar naŋ, yo moˀore naŋ, a mbiɗi nga hirnga naŋ a muŋ.

¹⁸ I ga sise da Bumbulvuŋ vur naŋ magi gwat mijeŋŋe na, yo i hunuma Bumbulvuŋ Mimadiɗa ti dimisi.