DIMISEY 69 - Bible en langue guiziga

Wuɗ, ya mawuɗ di hay ɗiki

¹ Dimis ngi wuzla dimis ngi Davitey. I mulumo di ar ɗerewol ngi buy dimis. Dimis ngi gujuvur.

² Aw Buymisemuŋ ɗu, kilo widi ɗu, yama naŋ ti ya asi ˀay.

³ I ra ci yik ng'ar ndileɓe, ko i lum hirwuy migidaŋ asi sar ɗu ta. Yam mijileŋ ara ndiy, mekepel ara kil ti ya.

⁴ Widi a giriy le, ˀay silik silik wãˀ, mumburlok ɗu ara tiɓi vu. Hiri a gir le ar li kutuko Buymisemuŋ ɗu.

⁵ Mizli mahirsikiy ngatara lambaˀ na, taŋ mbeˀmbeˀ, fineˀ himac hirnga ɗu, miziza vu tayna, t'ada ti gidaŋ, a gam ti ya mesene lambaˀa si. I hul gwat ta si na, i wuruko si mbri mbrike?

⁶ Amma ka, Buymisemuŋ, ki si na gilaw ɗu le, yo malambaˀ ɗuwoy i muɗumohoy avu ka ta.

⁷ Bumbulvuŋ, Buymisemuŋ, misi gidaŋ wãˀ, mizli manjaham hiri asi ka na, anja i pa taŋ mesem ta. Buymisemuŋ ngi Israyel, mizli miteŋteŋ ɗikeye, anja i so taŋ ti futuru ta!

⁸ Ya maɓusa zi na vur ka, anja mesem a sirtiy hiri.

⁹ yo i tiri mulak le a wuzla sukum ɗuwoyo, ziri ngi mumuŋ ɗuwoy kwana, a sinikiy mata.

¹⁰ Haˀaw, may ngi hay ɗik na, ara tiɓi ka vu a mevele, taŋ mazukuw na, a mbiɗi nga hirnga ɗu.

¹¹ I tuwuy le, yo i gi dalyam le, mizli ara zikiy aseˀe ma.

¹² I ki zana ngi vagay ma na, a kiɗam ti ya mambaˀa.

¹³ I tiri ɓi ngi kiɗa slir le ar li ngi luma, yo misi mbaazlahay, ara zlikiy dimisi.

¹⁴ Amma ya, yi ra diruw dibiɗ Bumbulvuŋ, i hin naŋ kasl ɓa ki tiɓiy di. Aw Buymisemuŋ ɗu, ka teŋteŋ haɗi, kisa lihiy gisiŋ zleˀe si, mbiɗiy di ayɗi.

¹⁵ Ki puliy i ci yik ng'ar ndileɓe ta, muɗo ya ti raŋ, tuɓo ya tivi mihiris ɗuwoyo, yo ɗiɗo ya tir yam mijileŋ!

¹⁶ Ki puliy ɓa mekepel a kil ti ya ta, anja mijileŋ ngi yam a ndiy ta, ki pula ɓa vigiɗ a dirzih ng'ar ya ta!

¹⁷ Aw Bumbulvuŋ, mbiɗiy di, asi ka teŋteŋ njah wãˀ. Ka mapur ircece haɗa na, mbuɗo hiri ng'avi ya,

¹⁸ yo ki ɗumo mihiri ɗike avu ya gawla ɗike mata so. I ro ar bonoy, mbiɗiy di kutum ta kwa.

¹⁹ Sawa gweˀ ng'avi ya, ɓa ki cik vu ar ya, lihiy avu mesene ɗuwoyo.

²⁰ Ki si na le, ara zikiy, ara pikiy mesem, yo a purikiy ka mbur ta, mizli mazliram ti ya tahaya, t'ani cek a mbuŋ ɗiki.

²¹ Zi a mbiy kwacay le, ara jiy vu, i ra kutuk ɓa mbur a mbiɗi neˀ angi ya, amma ndiɗaˀ wãˀ, i ra kutuk ɓa a tikinikiy ngi taˀa tuwuyo, amma ko i lum mbur loŋ ta.

²² Mesene ɗuwoy a pikiy slalak le ar gwat ngi zumo, yo da yam ara giy ma na, a vulikiy mbaazla mikwereke.

²³ Anja ɗaf taŋ mazumaka na, a ja taŋ kaɓa kwar, a tiri tebeɗ ngi ji taŋ ati ngama taŋhaya!

²⁴ Anja hiri taŋhay a hulufom, a puram mata, ga ɓa a ndiram girjaŋ girjaŋ.

²⁵ Vunaha mevel ɗike ng'ar taŋ, yo anja a titilaka himaˀ ɗik mufõh fõh na!

²⁶ Anja a ngurfoko taŋ walahay guɗuk taŋhaya, anja mbur loŋ mahin ar guɗuk taŋhay anta,

²⁷ asi mbur ka mikiɗa le si ma na, ara gakaŋ bonoy ava ma, makiɗaka mizli na, laway kiteka na, ara slufakaŋ.

²⁸ Mbuɗa mungra taŋhaya cek nga hirnga taŋ, anja ki ga taŋ jeŋŋe ɗike mata!

²⁹ Susuyumo slimiɗ taŋ ti wuzla mizli misi ti siifahay avra, ki toho taŋ nga wuzla mizli mijeŋŋeheye ta ma!

³⁰ Na ya, ya geˀ ircece, yo i ra si bonoy, aw Buymisemuŋ ɗu, kisa lihiy, kisa bi ti ya njiraŋ.

³¹ I sa hunumuw ka Buymisemuŋ ɗu ti dimisi, yo i sa guw dudok ti gi sise.

³² Pura, gwat ka mahĩyã i nah so Bumbulvuŋ, ki hĩyã fineˀ sla, fineˀ gusoŋ misi durum ati ketereke.

³³ Mizli miteˀteˀhey mapuraka kahana na, a mumulom, a ɓam: «Kum mizli masipam Buymisemuŋ na, Buymisemuŋ a jukum hutuŋ subur!»

³⁴ Asi Bumbulvuŋ a tiɓa ɓi ngi misi murgahaya, da a jaka mizli miteŋteŋ naŋhaya le ng'ar dangay na, anta a pula taŋ ta.

³⁵ Muŋ ati hirwuy waɗ mubuliy ati gwatay mawusamwenewene anga gar na, hunumaka Buymisemuŋ.

³⁶ Asi Buymisemuŋ a sa laha Siyoŋ, yo a sa ndira walahay madiɗa ngi Zudahay a muŋ. Mizli naŋhay a sa cifam anga, a sa tiri nga taŋ a muŋ.

³⁷ A sa wunkaka walahay madiɗa tayna da ziri ngi gawla ngi Buymisemuŋ, yo muwuɗa Buymisemuŋhoyo, a sa lumam li cifi a diga.