DIMISEY 66 - Bible en langue guiziga

Hunumaka Buymisemuŋ matiri ti mizlii diimuhoy

¹ Dimis ngi wuzla dimis ngi buy dimisey. Dimis. Mizli ngir duniya keɗeɗe, jam salalay da Buymisemuŋ.

² Slimiɗ naŋ mupuɗaw na, hunumaka ti dimisi, ɗuvakaŋ hirnga ti hunum.

³ Ɓaka Buymisemuŋ na: «Gwat ka maga gar na, a gi zluwun da mbur! Mesene ɗikey ara bubuɗam ti ka.

⁴ Anja mizli ngir duniya gar, a hurukom huruk huruk a mbuŋ ɗike, a hunumukuw ti dimis, a hunumukuw ti zila slimiɗ ɗike.»

⁵ Soko, kisa puraka gwat Buymisemuŋ miga taŋ, gwat ngi zuma hirngahay naŋ maga na, a gi zluwun da mbur.

⁶ A mbiɗa mubuliye, a tiri di ruwuy migidaŋ gidaŋ, mizli a cohom a mizawa, ti sar njiraŋ njiraŋ. Mumulukum vur gwat madiɗa naŋ miga nah.

⁷ Buymisemuŋ ti gidaŋ naŋ, ara wa li ngi sete, ara jigina sukwi ngi mizli ngi si ruwuyo hiri taˀ avu taŋ, ɓa mizli mislikiɗa ɓihey a huhumom vu ta!

⁸ Mizli, gaka sise da Buymisemuŋ ndra, hunumakaŋ ˀay ngar ngar.

⁹ I naŋ mavula ndra siifa, ara jaha ndra jah, ɓa i ndilam ta.

¹⁰ Aw Buymisemuŋ, ki jiɗa kwacay ndra le, ki buna ndra le kaɓa mabunam ɓiri gaza ar vu.

¹¹ Ki hizigiɗa ndra le, ɓa i cam ng'ar kwar, ki gira ndra le kupuyah wãˀ ti menderehey.

¹² Ki pula jiviɗ le da mizli, ɓa a gam ti ndraka ginew ngi jijira gwatay, i cam le ar vu waɗ ar yam, amma ki bo ti ndra le ti nga, ɓa i musuwunam fẽh.

¹³ I ci ng'ar hay ɗike, nga guw mikuli ti ginew zlam zlam, ɓa ɓi ɗu ngi ji mi ɗik na, i ga gisiŋ,

¹⁴ i ɓi ya mubo di ti balam ɗu, irne ɗu miɓa ti ya misi zle ar bonoy.

¹⁵ I guw mikuli mizlam zlam ti ginew misi malay, waɗ zlengerekey mazlumam, ɓa cunju taŋ a jiɗ ng'avi ka. I ra wi vu ti gusoŋ waɗ mazawalay.

¹⁶ Kum mizli mazluwunam ti Buymisemuŋ gar, soko, cinam ya maslufa gwat Buymisemuŋ migiy di.

¹⁷ Ya mitilaŋ mi le, ɓa a kilo widi ɗu na, naɓa i wi vu le weˀ ngi hunumaŋ si.

¹⁸ Da wuluk ɗu, i ngi gi malambaˀ zleˀe na, anja ani Bumbulvuŋ a ciniy di zleˀe ta.

¹⁹ Amma Buymisemuŋ a ciniy di le, a jiko slimiɗ le ngi cine diradibiɗ ɗu.

²⁰ I ga sise da Buymisemuŋ, a pula tiɓa diradibiɗ ɗu ta, a buˀ ti gi teŋteŋ naŋ avu ya ta.