DIMISEY 65 - Bible en langue guiziga

Buymisemuŋ, ki ndila le ɓa a hunumukuw

¹ Dimis ngi wuzla dimis ngi Davitey. I mulumo di ar ɗerewol buy dimis.

² Aw Buymisemuŋ misi a Siyoŋ, ki ndila le ɓa i hunumukuw, ɓi ndra miɓaka ngi ji mi ɗik na, sey i gukuw di.

³ Mizli gar a sa soko ng'avi ka, asi ka macina diradibiɗ taŋ na.

⁴ Mungra ɗuwoy a finikiy gidaŋ le wãˀ, amma ka, ki ra puya ndra taŋ avra.

⁵ Mbur ka muwunaŋ le na, a mumul, a cifi a hay ɗike. Zlili ngi hay ɗik ati gwat mipal ngir hay ɗik na, i sa mbam di kuy kuy wãˀ.

⁶ Buymisemuŋ milih ndra, ki mbur mijeŋŋe, ki mbiɗa ndra mingiɓi ndra ti gwat ngi zuma hirngahay. Hirwuy gar, bal bal ti matura mikileŋ kileŋheye, a roko zuy zuy.

⁷ Ki tikaˀay da muwãhaya, ɓa a ndiram nga taŋ nga taŋ, gwat ngi vurum ɗike, i gidaŋ ɗik mihaɗa na.

⁸ Ki taˀa mubuliy mahurumo, ki taˀa diɓel ngi yam mahurumo, yo sukwi ngi mizli mira slikiɗam ɓi na, ki taˀa taŋ mi lek.

⁹ Hirwuy kurzluˀ gar, ara zluwun ti gwat ngi zuma hirngahay ka miga taŋ na, ki ga ɓa mizli misi tisi pas ngi miprikey waɗ misi tisi pas ngi pastaˀahaya, a jukuw salalay.

¹⁰ Ki ra ki slimiɗ angi hirwuyo ki ra paŋ yam haɗi, ki ra mbaŋ ti zlili. Yawwa Buymisemuŋ ɗu, zlazlar ɗikey a roko fin fin, ki ra ga daw da mizli, ki ɗiya hirwuyo kahana:

¹¹ Ki ra pa yam jiniy jiniy da totoŋhoyo ki ra waha hohoyoyo ɓa li a gi sinirre, ki ra huluɓa hirwuyo ti vuŋ, ki ra ɗuwula mi da hilfa gwatay, ɓa a pusam.

¹² Vi ngi gi mezle, ki kiɗa mi naŋ ti kuy, tir li ka macuh gar na, zlili ara ɓul.

¹³ Zlili ara ɓul ar li zum ngi ginewey a ɓuh, ara gunoko muwãhaya ti ji salalay.

¹⁴ Li zum ngi gineweye, a ro sikiniy ti ginewey, sozohoy a roko fil fil ti daw, gwat gar ara ji salalay, ara zli dimis.