DIMISEY 63 - Bible en langue guiziga

Gi mezle ɗik a funa siifa le

¹ Dimis ngi wuzla dimis ngi Davitey, a ɓi ɓi ngi naŋ misi a wuzlaɓuh mikirɗak kirɗak ngi Zuda.

² Aw Buymisemuŋ, Buymisemuŋ ɗu i ka, zle ti li si na, i ra supuw, may ɗik ara jiy vokoɗ vokoɗ, dumvu ɗu gar a ro ti may ɗike, kaɓa hirwuy mumuˀul le ngbasl ngbasl, manja yam.

³ Ti ya mupuruw ar hay ɗik, ya masingila gidaŋ ɗik ati dudok ɗik na, a giy kanah so.

⁴ Haˀaw, teŋteŋ ɗike, a funa siifa le, i sa hunumuw ˀay ngar ngar.

⁵ I sa guw sise ar hin ngi siifa ɗu gar, yo i sa zuɓa haŋ paɗ a muŋ, ngi guw dudok ti slimiɗ ɗiki.

⁶ I sa mbi kaɓa mbur muro kwacay ndeŋ ndeŋ ti gwat ngi zum mezleŋ, i sa hunumuw ti dimis, singir taˀ avu mi.

⁷ Ya muro tup ar li hin ɗu na, i ra wuluk ar ka, i gi ler mbeˀmbeˀ ar li diruw dibiɗe.

⁸ Asi ki jiniy le, ya muɗum asi kirpasl ɗik na, i ji salalay.

⁹ I gumbuˀ le ng'avi ka ti mevel purla, yo gidaŋ ɗik a jihiy le jah.

¹⁰ Mizli mawuɗam ziza hutuŋ ɗu na, anja a zizam! Anja a cam sesẽŋ ng'ar li ngi mizli mumucahay!

¹¹ Anja a ngumaka taŋ ti maslalam! Anja kiriɓuhoy a humbuɗaka taŋ!

¹² Dar buy a sa mumul mbele Buymisemuŋ, ko wa gar mahudum ti slimiɗ naŋ na, a ngil di wuy gu, asi migi slireye, a sa gicaka mi kap kap.