DIMISEY 59 - Bible en langue guiziga

Bumbulvuŋ ɗu, lihiy avu mizli mawuɗam muc ɗu

¹ Dimis ngi wuzla dimis ngi Davitey. I mulumo di ar ɗerewol buy dimis. A ɓi ɓi ngi Sawul mislina mizli nga jigina hay ngi Davit, ɓa a kiɗaka vagay. Dimis ngi zli ti ˀay maɓi: «Ki pula a hiryi ta…»

² Buymisemuŋ ɗu, lihiy avu mesene ɗuwoyo, jiginiy avu mizli mapikiy hiri.

³ Lihiy avu mizli mawuɗam a gikiy malambaˀa, yo jiginiy avu mikiɗa hirngahaya.

⁴ Pura, t'ani ara kutukikiy ɗum ɗum, mizli migidaŋhay, ara wuɗam a kiɗikiy, i gi malambaˀ ta, yo i gi mungra ta ngbaŋ, Bumbulvuŋ ɗu!

⁵ I gi gwat ta ngbaŋ, joˀ taŋ a kilam, ara wam vu le weˀ. Puɗuk takwa Buymisemuŋ ɗu, so ji ti ya hirnga, ɓa ki puraŋ!

⁶ Ka Bumbulvuŋ, Buymisemuŋ misi gidaŋ wãˀ, Buymisemuŋ ngi Israyel, puɗuku, ɓa ki kuta sukwi ngi mizli tayna gar ti bonoy, mizli mavulam mizli ngi ji tayna, ko ki pura taŋ ircece ta.

⁷ Ti pastaˀa, a moko, a wudam kaɓa kirihey, a gunoko walahaya kper kper.

⁸ Pura taŋ ɗi, mongofok kokof kokof a mi, mingiɓi taŋ a zum raɓ raɓ kaɓa maslalam, a ɓam: «Mbur macina mingiɓi ndra ada kwa?»

⁹ Naka Bumbulvuŋ, joˀ ki singir ar taŋ, ki ra singir ar sukwi ngi mizli tayna gar.

¹⁰ I ro hiri taˀ avu ka, ki gidaŋ ɗu. Li ɗu muguno ti mohol, i ka Buymisemuŋ.

¹¹ Buymisemuŋ miteŋteŋ, a ro ɓaˀ a mbuŋ, mizli majiɗikiy ɗum ɗum na, Buymisemuŋ a ga ɓa i pura taŋ hiris le.

¹² Ki ngizla taŋ kuɗup ta, naɓa mizli ɗuwoy a sa puyukom ti ka hirnga. Bumbulvuŋ, mbaray ndra, hira taŋ har har ti gidaŋ ɗiki, zlumbura taŋ ɓaˀɓaˀa!

¹³ Taŋ muwunaka mi le gar si na, i ngi ɓi ɓi malambaˀa, anja huhumo vu taŋ na, a ja taŋ kaɓa kwar, asi ara nisam vu, yo ara gam slir haɗa.

¹⁴ Ngizla taŋ ti himaˀ fõh fõh, ngizla taŋ pay, ko mbur a ndir loŋ ta wãˀ! Ɓa hã ar duniya keɗeɗe, a sinaka Buymisemuŋ, mazum buy a ruwuy ngi Zakopo i naŋ.

¹⁵ Ti pastaˀa, a moko, a wudam kaɓa kirihey, a gunoko walahaya kper kper.

¹⁶ A laˀam aka aka ngi sipa gwat ngi zum, da a mbam ta na, a wunam li kap ar li niˀici.

¹⁷ Na, ya i ra zli dimis ngi hunumuw, asi gidaŋ ɗiki, ti miprike, i juw salalay, asi gi teŋteŋ ɗiki, asi ka, ki li ɗu muguno ti mohol, li ɗum ɗu tapas bonoy mulumiy le.

¹⁸ I sa zluw dimis ngi hunuma vu, ka gidaŋ ɗu. Li ɗu muguno ti mohol, i ka Buymisemuŋ, Buymisemuŋ miteŋteŋ avu ya!