DIMISEY 58 - Bible en langue guiziga

Buymisemuŋ magi kiita ada asi ruwuyo

¹ Dimis ngi wuzla dimis ngi Davitey. I mulumo di ar ɗerewol ngi buy dimis. Dimis ngi zli ti ˀay maɓi: «ki pula a hiryi ta…»

² Gisiŋ mizli! Da ki ra ɓam ɓi na, ɓi mijeŋŋe anta bo ta. Kum mizli titrahay, kum ada gam kiita micirre ar wala kumo kwa?

³ Ĩˀĩh! Ki gaka gwat mijeŋ ta waˀwaˀa: ki ra ya ka moˀore asi ruwuyo ta haŋ kumo.

⁴ Misi moˀoreheye, a zlaka ngizla jiviɗe diga taŋ misi a kwacay, migi slireye, a ɓam lambaˀ diga yi taŋ caka.

⁵ Taŋ ti muwuŋ kaɓa ngi kaw, a gam kaɓa a cinam ta, a dislaka slimiɗe le kaɓa kwecesle.

⁶ Gwat ngi dungur ngi midi matayay mahurumom na, kwecesle, anta cine ta, ko ngi mbur misina hirnga ngi dum haɗa kwana, anta cine ta.

⁷ Aw Buymisemuŋ ɗu, ngila sliŋ ngi balam taŋhay avra, Bumbulvuŋ, taŋ kaɓa moboroy, ngila taŋ sliŋ taŋ mungoryoŋ ngoryoŋ na.

⁸ Anja a hisikam kaɓa yam! Anja Buymisemuŋ a mula taŋ, a pa taŋ sunok sunoko!

⁹ Anja tiram kaɓa hurzlozloŋ masisira tazlay naŋ ar li ru! Anja a puraka pasa ta, kaɓa zuŋ mipaka ti pi!

¹⁰ Ɓa hã a sa gilam tikeˀe kaɓa widis misi hadaway na, naɓa musure a kil ti taŋ le, ko ndizlzle kine, malla ko mumuˀulo le kwana zuy.

¹¹ Mbur mijeŋŋe masa pura Buymisemuŋ mapula bol na, a sa mumul. A sa buna saraya ceɗ ceɗ ar pumbus ngi misi moˀoreheye.

¹² Akẽh na, mizli a sa ɓam: «Haˀaw, mbur mijeŋŋe ara luuma migir naŋ, haˀaw, Buymisemuŋ migi kiita ada asi ruwuyo.»