DIMISEY 56 - Bible en langue guiziga

Mbur masipakaŋ nder nder, mapula vu naŋ asi haŋ ngi Buymisemuŋ a muŋ

¹ Dimis ngi wuzla dimis ngi Davitey. A ɓi ɓi ngi Filistihey mijakaŋ a Gat. «Dimis ngi zli ti ˀay ngi gonokoy ar widis madiɗa mikileŋ.» I mulumo di ar ɗerewol ngi buy dimis.

² Aw Buymisemuŋ ɗu, puriy ircece, asi mbur ada gidiɗiy, vur hin gar i ra kiɗam vu, ara guzuvuriy.

³ Vur hin gar na, mijiɗa vuhoy ara gidiɗikiy, amma a muŋ kẽh, zigiduw taˀ, ara kiɗam vu asi ya.

⁴ Tapas ya mira zluwun na, i njih hiri njah asi ka.

⁵ I hunuma Buymisemuŋ asi mingiɓi naŋ, naŋ miɓa na, i njih hiri njah asi Buymisemuŋ, i zluwun ta: mbur titra, a giy mi geˀ ka?

⁶ A ra gikiy bonoy vur hin gar, a wulkam sey ngi hiryi ɗu.

⁷ A roko ɗum ɗum, a ro jiɗikiy, a roko ɓaˀa angi sar ɗu, ɓa ngi zizi ɗu.

⁸ A sa laham avu malambaˀ taŋ migaka hana kwa? Aw Buymisemuŋ ɗu, ji mevel, kiɗa taŋ.

⁹ I gi sulome is kiteka, ki slufa le, cikila tuwuy ngi hiri ɗu ar kwenekwene ɗiki. Na zle, ki toho le nga wuzla gwat ɗikeye takwa?

¹⁰ Tapas ya masa ziluw na, mesene ɗuwoy a sa mam murdirba, i si na le, ka Buymisemuŋ, ki nga ya.

¹¹ I hunuma Buymisemuŋ asi mingiɓi naŋ, naŋ miɓa na, haˀaw, i hunuma Bumbulvuŋ asi mingiɓi naŋ, naŋ miɓa na.

¹² I njih hiri njah asi Buymisemuŋ, i zluwun ta. Mizli titrahaya, a gikiy mi geˀ ka?

¹³ Aw Buymisemuŋ ɗu, gwat ya muɓuw di ɗaˀ le, ɓa i ga na, sey i gaŋ, i sa guw mikuli ngi hunumuw.

¹⁴ Asi ka Buymisemuŋ, ki lihiy le avu muco. Ki jihiy le jah, ɓa i diɗ ta, ɓa i ru ɓaˀ a mbuŋ ɗiki, ar li minjahha mavul siifa.