DIMISEY 51 - Bible en langue guizigaDira dibiɗ ngi pula mungra 1 Dimis ngi wuzla dimis ngi Davitey. I mulumo di ar ɗerewol ngi buy dimis. 2 A ɓi ɓi ngi mijiviɗ Nataŋ mira pura Davit, a dirba Davit vuna migam madama ati Batseba. 3 Aw Buymisemuŋ ɗu, ka miteŋteŋ haɗa na, puriy ircece. Ka mapur ircece haɗa na, susuyumo mungra ɗuwoy avra. 4 Buniy malambaˀ ɗuwoy ndrehhe avra, yo buniy mungra ɗu avra. 5 Asi i si na zluɓ ɗu le, mungra ɗu naŋ da ndrehhe a mihiri ɗu. 6 I guw mungra le, i guw di da ka pal ɗike, gwat ka mapura kuy ta na, i ga le si, vurˀe, ka mira ɓa ɓi na, naŋ jeŋŋe, ka mira ga kiita na, mbur a mbuɗuw hirnga ta. 7 Pura, a yikiy cak ar gi gwat malambaˀa, ya guzluv ar mungra, diga ya misi a kwacay maha. 8 Amma gwat ka mawuɗ a mevel mburo, i ɓi mikaslsla. Ar wuluk mijileŋ ngir mevel ɗu, ki ra vuliy sin ɗiki. 9 Zuɓa mungra ɗu avra ti mihaŋ ngi izop, ɓa mevel ɗu a tiri leɗeɗe, buniy, ɓa i tiri babara fineˀ yama. 10 Tiliy mi ti ɓi ngi pula mungra, ɓa i zluzluɓ, i mumul haɗa, ka mumuɗiy didak tuwa na, ɓa i sa ɓuruku. 11 Mbiɗi duba avu mungra ɗuwoyo malambaˀ ɗuwoy gar na, puya taŋ avra. 12 Aw Buymisemuŋ ɗu, giy mevel mileɗeɗe, ciy wuluk ma nawayaŋ. 13 Ki hizigiy fuk kileŋ avu ka ta. ˀUf ɗik mipal misi angi ya na, ki tiɓa a muŋ ta. 14 Ka milihiy na, ga ɓa yi mumul, yo anja ˀUf ɗik a jihiy jah gidaŋ gidaŋ. 15 Mizli muzluɓam ɓi le gar na, i dubuna taŋ sipa jiviɗ ɗike, joˀ migi mungrahay, a sa moko ng'avu ka a muŋ. 16 Aw Buymisemuŋ ɗu, Bumbulvuŋ milih ɗu, lihiy avu muco, ka milihiy na, ɓa i til mi ti ɓi nah calala ti irne ɗu. 17 Bumbulvuŋ ɗu, wuniy mi ɗu, ɓa i hunumuw ˀay paɗ a muŋ. 18 K'anta ki ngum i guw mikuli ta, mikuli ti ginew zlam zlam kwana, k'anta ki wuɗ ta. 19 Aw Buymisemuŋ ɗu, mikuli ka mawuɗ na, i mikuli magukuw di ti didak gbeŋ gbeŋ, Buymisemuŋ ɗu, ya misi didak gbeŋ gbeŋ na, ki puliy fuk ta. 20 Ga mezle da Siyoŋ, ndira mohol ngi Zeruzalem a muŋ. 21 Dar kisa wuɗ mikuli mijeŋŋehey gwat ngi vul wãˀ waɗ mikuli ti ginew zlam zlam wãˀa, a sa gam mikuli ti gusoŋhoy ar li ngi mikuli ɗike. |
Bible en Langue Guiziga © L’Alliance Biblique du Cameroun, 2011.
Bible Society of Cameroon