DIMISEY 5 - Bible en langue guiziga

Dira dibiɗ ngi mbur Bumbulvuŋ mutiɓaŋ le

¹ Dimis ngi wuzla dimis ngi Davitey. I mulumo di ar ɗerewol ngi buy dimis. Dimis ngi bozloro.

² Bumbulvuŋ, jika slimiɗ asi mingiɓi ɗu, cine ya maniˀic na takwa.

³ Bumbulvuŋ ɗu, buy ɗu madiɗa, ya maziluw na, ambuh, ciniy di ayɗi, yo ya matumbul na i kaha.

⁴ Bumbulvuŋ, cine ˀay ɗu zle ti mipriki, i ra juw vu zle ti miprike, ɓa ki tiɓiy a hay ɗike, i kutuk so.

⁵ Ka Bumbulvuŋ, k'antakaɓa kuli mahĩyã malambaˀ na ta, k'anta tiɓa mbur misi moˀore a hay ɗike ta.

⁶ Mbur mahuhum vu na, naŋ anta so a mbuŋ ɗike gu ta. Mizli gar migi malambaˀ da mizli na, ki ra hirsa taŋ.

⁷ Ki ngizla mizli misi slireye. Mbur migi gilaw da mizli ati mikiɗa hirnga na, anta guw ka Bumbulvuŋ kuyta wãˀ.

⁸ Amma, ya maci ngi hay ɗik mipal gu na, mbele gi mezle ɗiki, i huruk huruk a mbuŋ ɗik, angi hay ɗik mipal na, ɓa i ɗuvuw hirnga.

⁹ Bumbulvuŋ ɗu, bigiy jiviɗi, asi ka mijeŋŋe na, ko da mizli ara jiɗikiy tekeɗe kwana, ɗiyiy jiviɗ ɗike ɗalla a mbuŋ ɗu.

¹⁰ Taŋ na, ɓi midar anta angi mingiɓi taŋ ta. Mevel taŋhaya ndus ndus ti ɓi ngi gi gwat malambaˀhay. Mumburlok taŋhaya, taŋ kaɓa zivi mibaŋ kine, yo irne taŋ maɓam di, naŋ ka misirnene maslir ti mbur.

¹¹ Aw Bumbulvuŋ ɗu, wurka taŋ malambaˀ taŋ na. Anja gwat taŋ majuwaka a mevel taŋ ngi gi na, a hizigiɗa taŋ. Ɓula taŋ avra, asi gwat malambaˀ, taŋ migaka gar na. Asi mike na, a slikiɗam ɓi le avu ka.

¹² Yo mizli maɗumom avu ka gar na, a sa mumulom, a sa zluzluɓam ndrehhe, asi kisa jigina taŋ, mizli mawuɗam zila slimiɗ ɗik gar na, kisa ga ɓa a jam salalay.

¹³ Bumbulvuŋ, maɗuwula mi da mbur mijeŋŋe i kaha, ki ra jiginaŋ ti gi mezle ɗike kaɓa ti mbaray.