DIMISEY 45 - Bible en langue guiziga

Dimis ngi vula ngwas ngi buy madiɗaŋ

¹ Dubun ngi sukwi Kore. I mulumo di ar ɗerewol ngi buy dimis. I dimis ngi gujuvur, dimis ngi wuɗa vu.

² A ra giy vekeɗ vekeɗ a mevele ngi ɓi ɓi mezle, i wuɗ i zli di dimis ngi ɗuva hirnga da buy madiɗa. Anja ˀirne ɗu a bam vu ati gwat ngi toho gwat ngi mbur misina toho gwat le ti jiviɗ naŋ cirɗeɗɗe.

³ Ki funa mizli le gar ti kuyo, mingiɓi ngi balam ɗike, naŋ ndum haɗa teˀe. Yo Buymisemuŋ a ɗuwuluw mi le hã ngi set.

⁴ Haˀaw bugawla ɗu, luwa maslalam ɗike law a ciki, ki madiɗaŋ, yo ka ti dudoko ma.

⁵ Ka ti dudok ɗik na, jiɗ pilis nga gi vurum ngi cika vu, asi ɓi migisiŋ gisiŋ, ɓi mikaslsla ati ɓi mijeŋŋe. Anja ki gi gwat madiɗahay ti haŋ ɗike.

⁶ Luvut ɗikeye taŋ piyeŋ piyeŋ, ka masa mula mesene ɗikeye jeŋŋe a mevel dar dar na, mizli a sa ndilam saɓaɓaɓa asi sar ɗike.

⁷ Haˀaw Buymisemuŋ ɗu, gidaŋ ngi zumabuy ɗike naŋ hã ngi sete. Ki jigina mizli kasl kasl ti ganday ngi ɗik ka buyo.

⁸ Ki wuɗ di i gi gwat mijeŋŋe, amma ki hirsa gi gwat malambaˀa. Buy ɗik, Buymisemuŋ mupuw mal ngi vula mumul a hirnga na, vurˀe, yo a wini di i ka, mbak cil ɗikeye le.

⁹ Zana ɗikeye, a zãˀãm urdi urdi pal naŋ, urdi mir, alowe waɗ kanel. Hay ɗik migakaŋ wuya ti slin ngi begenehey, hurum ngi gwat ngi ɓurukoy macinoko zle ara na, ara gukuw mumul.

¹⁰ Zir diili ngi buyoyo t'ada kẽh, vu ɗiyeˀɗiyeˀ ti gwat ngi wuya ɗikey, yo ngwas deŋ tir haŋ hazum ɗike, ɗiyeˀ ɗiyeˀ vu, denjek ti ɓiri tapasl tapasl mipal naŋ kine.

¹¹ Zuŋ ɗu, cin, pur hiri, yo jika slimiɗe: puyuk hirnga ti muy ɗikey ati mizli ngi hay kumoyo.

¹² Anja buyo, a wuɗuw asi kuy ɗik na, buy ɗik i naŋ, huruk huruk a mbuŋ naŋ.

¹³ Mizli ngi hirwuy Tir, misi zlilihey, fineˀ mizli gar na, a sa tikinukuw ti gwat ngi vul ngatarahay.

¹⁴ Zuŋ ngi buyo a ro a hur haya. Kayya, hiri a ɗuv ava ta wãˀ. Naŋ ti zana misilmir, migakaŋ wuya geˀ geˀ ti ɓiri tapasl tapasl.

¹⁵ A ki zana migakaŋ wuya, misi yam naŋ wal wal a sluf ta wãˀ, a cam di ng'avu buyo, diili cil naŋhay, ngama naŋhaya, a cam ng'avaŋ.

¹⁶ A ki saka taŋ hiɗim hiɗim ti ji salalay, a cam ng'ar mugum ngi buyo.

¹⁷ Zir ɗik mizilehey a sa cam ar li ngi dideˀ ɗikey, kisa tir taŋ yarma ngi duniya keɗeɗe.

¹⁸ I sa mahiri ngi zila slimiɗ ɗike da mizli masa ya ka taŋ gar, yo mizli a sa gukuw muguzlum ngi caˀa.