DIMISEY 44 - Bible en langue guiziga

Ki pula ndra le fuk ngbaŋ

¹ Dimis ngi wuzla dimis ngi sukwi Kore. I mulumo di ar ɗerewol ngi buy dimis.

² Haˀaw Bumbulvuŋ ndra, slra madiɗahay, ka miga taŋ ar hin ngi dideˀ ndrahay, zlezlezleˀe na, a slufam ndra di le, i cinaka ɓi nah le ti slimiɗ ndra.

³ Ka ti haŋ ɗike, ki ɓula sukwi ngi mizli ɓak le avra ɗagay, ɓa ngi cifa dideˀ ndrahay ar li taŋ. Ki ziza sukwi ngi mizli kap kap ɗagay, ɓa a pulaka li da sukwi ngi mizli ɗikeye.

⁴ Dideˀ ndrahay mitiɓaka hirwuyo da taŋ na, anta ti maslalam taŋhaya ta, yo i haŋ taŋ muluma taŋ bugawla ta ma. Amma i gidaŋ ngi haŋ ɗik ati hiri ɗik mitaˀ ar taŋ na, muluma taŋ di, asi ki ra wuɗ taŋ.

⁵ Haˀaw Bumbulvuŋ ɗu, ka buy ɗu. Ka ɓi ɗaˀ si na, naɓa Zakop a lum bugawla si.

⁶ Ndra muɓulaka mesene ndrahay na, mbele ka, yo ndra mukurpaka mizli mapam ndra hiri na, mbele ka.

⁷ Y'anta njih hiri asi lek ɗu ta, y'anta lum bugawla asi maslalam ɗu ta.

⁸ Mizli mazliram ti ndra ta na, ki tika ndra ˀay taŋ le, yo mesene ndraˀahaya, ki mataŋ le nga ruwuy.

⁹ Vur hin gar na, i ra zlam dimis ngi hunumuw ka Bumbulvuŋ, yo i ra gam muguzlum ar slimiɗ ɗike, ko mbak le ta.

¹⁰ Dambalaka ki zliɗa ndra le zlaɗ avra ngbaŋ, ki pa ndra mesem le, ko k'anta ru asi soje ndraˀahaya ng'ar vurumo mata.

¹¹ A mbuŋ mizli mazliram ti ndra ta na, ki ma ndra murdirba, joˀ mesene ndrahay a hilaka gwat ndraˀahaya.

¹² Ki vula ndra ɓa a jam ndra, kaɓa tumuŋhoy nga sli ˀay, ki zliɗa ndra hirnga le mber mber nga wuzla sukwi ngi mizli.

¹³ Ki vula mizli ɗikeye ngataraŋ, manja gi cikili, ki hiɗika taŋ le avra, ko ki lum taŋ gwat neˀ le ta.

¹⁴ Ki pula ndra mbak da midigwi ndrahay a zam ndra, waɗ da mizli mugun hirnga ndraˀahaya, a ɓam ndra mi ngi sliŋ, yo a singiram ar ndra.

¹⁵ Ki pula ndra mbak ɓa sukwi ngi mizli a kiɗam mambaˀ ti ndra, yo a mbuŋ ndra, mizli a hiram hirnga ar ndra.

¹⁶ Vur hin gar na, i ra pura ya mahĩhĩy na, yo mesem ara sirtiy sirit,

¹⁷ asi ya macina ˀay ngi mesene ɗu mupula cuwal, mahiziga widi ngi jigina mi avu ndra, yo mazuw ka Bumbulvuŋ na.

¹⁸ Gwat tayna gar, a gam le avu ndra. Amma ndr'i puyukom hirnga ti ka ta, yo jumoˀay ɗik ati ndra na, i ngilaka ɓi nah ta.

¹⁹ I mam murdirba ta, yo i ngizlam avu jiviɗ ɗike ta ma.

²⁰ Hana gar na, a gi ti di ka mukurpa ndra asi sar ar ɓuh ngi kiriɓuhoy, yo ti ka mipa ndra ng'ar li luvuŋ makiɗ vu vagay na.

²¹ Ka Buymisemuŋ ndra na, da i puykom hirnga le zleˀe ti ka, yo da i ra cufuɗam jini zleˀe avu kulihey, mbak ka le na,

²² anja ni ka Buymisemuŋ misina gwat miyaŋŋa ngir mevel ngi mizli na, ki si na le takwa?

²³ Taŋ makiɗam ndra vagay vagay vur hin gar, yo taŋ magam ti ndraka tumuŋhoy nga sli ˀay na, asi ka.

²⁴ Bumbulvuŋ, puɗuku, ki hinje vur mike? Puɗuk wãˀ si, ki pula ndra mbak zlaɗ wãˀ ta.

²⁵ Ki ɗumo mihiri ɗike vur mike? Yo ki puyuko hirnga ngi mendere ati bonoy maluma ndra na sukwa?

²⁶ Asi i roko putukul putukul ar murɓuku, kuɓ kuɓ murkwacay a ruwuy.

²⁷ Slikiɗ, so jina ndra takwa! Mbuɗo hirnga ndra, ti gi teŋteŋ ɗik na.