DIMISEY 42 - Bible en langue guiziga

ƊEREWOL MUCUW NAŊ ( Dim 42—72 ) Muuni muro ti madalyam…

¹ Dubun ngi sukwi Kore. I mulumo di ar ɗerewol ngi buy dimis.

² Aw Buymisemuŋ ɗu, kaɓa muuni muro ti may ngi si yam ar zlazlar na, ya kwana, membezleŋ ngi vu ɗu, a ro ti may ngi sipi ɗike ya.

³ May ngi Buymisemuŋ ara jiy, Buymisemuŋ misi ti siifa. I sa ci ngi hay Buymisemuŋ tivuna, ɓa i cici deŋ a mbuŋ naŋ naka?

⁴ Ti duvuɗ ati papas gar na, ɗaf ɗu i tuwuy, asi ara ɓikiy vur hin gar: «Buymisemuŋ ɗike naŋ a maka?»

⁵ Tapas, ya miki ɓaˀ a mbuŋ mizli ng'ar hay ngi Buymisemuŋ na, zigiduw hiɗim hiɗim ti mamar ngi muguzlum, ti salalay, ti mumul ngi ga sise da Bumbulvuŋ, i wuɗ ɓa hin nah, a so keŋ a hirnga ɗu a muŋ.

⁶ Ki lik vur mike, membezleŋ ngi vu ɗu? Ki niˀic ar ya vur mike? Zuwen ɗuva wuluko taˀ angi Buymisemuŋ! I hunumaŋ, naŋ milih ɗu, yo i Buymisemuŋ ɗu ma!

⁷ Aw Bumbulvuŋ ɗu, membezleŋ ngi vu ɗu a mbiɗi hirnga le ng'ar ya, ya maziluw na vurˀeŋ, i zilo ka zle a ˀayzaw Zurdeŋ, zle a muwã Hermoŋ, yo zle a muwã Miseyar.

⁸ Daka muhurumo yamaya le ti gidaŋ gboh na, yam ngir mubuliy mijileŋ jileŋheye, a zilam vu ar wala taŋ. Ki ngi taŋ diɓel, ki mbuzlo taŋ grip grip cek ng'ar ya, kay, yam a ndiy le surum wãˀ.

⁹ Ti papasa, Bumbulvuŋ ara gi teŋteŋ avu ya, yo yi wun li kap ar li hunumaŋ ti dimis, waɗ ar li diradibiɗ da Buymisemuŋ, naŋ mavuliy siifa.

¹⁰ Bumbulvuŋ, gidigil muwã ɗu, i wuɗ i ɓaŋ na: «Ki puyuk ti ya hirnga vur mike? Ki puliy i cuh ti ndurɓo hiri vur mike? Yo ki pula mesene ɗuwoy a kurpikiy kirap kirap vur mike?»

¹¹ Haŋ ati sar ɗuwoyo gar na, nguɗ nguɗ wãˀ, mesene ɗuwoy ara zikiy, yo vur hin gar na, ara ɓikiy: «Bumbulvuŋ ɗike naŋ amaka?»

¹² I lik vur mike? Yo i niˀic ar dumvu ɗu vur mike? I ɗuva wuluk ɗu le taˀ ar Buymisemuŋ! Haˀaw, i sa gaŋ muguzlum ava ma. Naŋ i milih ɗu, yo i Buymisemuŋ ɗu.