DIMISEY 41 - Bible en langue guiziga

Dira dibiɗ ngi mbur masipakaŋ nder nder

¹ Dimis ngi wuzla dimis ngi Davitey. I mulumo di ar ɗerewol ngi buy dimis.

² Mbur maki slimiɗ ar hĩhĩyahay na, a mumul! Ar hin ngi bonoyo, Bumbulvuŋ a lahaŋ.

³ Bumbulvuŋ a pulaŋ ti siifa, yo a mumul a ruwuyo. Anta pulaŋ a diɗ ng'asi haŋ ngi mesene naŋhay ta!

⁴ Bumbulvuŋ ara jahaŋ jah angi naŋ mutup masi bonoyo, a ndir deŋ ti deŋ ar jiji naŋ.

⁵ I ɓi na: «Bumbulvuŋ, puriy ircece, mbuliy, asi i gi malambaˀ le avu ka.»

⁶ Mesene ɗuwoy ara ɓam ɓi malambaˀ ar ya. A ɓam: «A sa muc tivuna, ɓa slimiɗ naŋ a susuyumo ka?»

⁷ Da mbur purla asi taŋ, a so le nga pur ɗu na, a wuluk ngi giy malambaˀ, a ji mbaɗakaw kaw, naŋ mibi le si na, a ya ɓi nah cak cak.

⁸ Mizli mazliram ti ya ta tayna gar, taŋ micikilam le gweˀ avu ya na, a sisikam ˀay, taŋ migweˀ avu ya na, a waka weˀ na, ɓi madiɗa a lumiy le.

⁹ A ɓam: «Gwat mukuy ta a lumaŋ le, naŋ mihinuw le a ruwuyo na, k'anta slikiɗ di mata!»

¹⁰ Ko ngama ɗu, ya manjih hiri aseˀeŋ, yo ndra mazumam ɗaf cuwa na kwana, a mbiɗi hirnga le avu ya.

¹¹ Amma ka Bumbulvuŋ, asi ircece ɗik na, slikiɗiy deŋ, ɓa yi pula bol ɗu.

¹² Gwat ɓa ya masina gi mezle ɗik ava na, ani: anja mesene ɗu, a zli dimis ngi bugawla a hirnga ɗu mata.

¹³ Ki jihiy le jah, ki bo ti ya le njiraŋ ti vu ɗu kuy kuy. Yo ki ɗiyi le ngi wãˀ a mbuŋ ɗike.

¹⁴ Sise da ka Bumbulvuŋ, Buymisemuŋ ngi Israyel, sise sise diga zlezle, hã ngi sete! Amin, Amin!