DIMISEY 4 - Bible en langue guiziga

Bumbulvuŋ micik vu asi gila ɓi

¹ Dimis ngi wuzla dimis ngi Davitey. I mulumo di ar ɗerewol ngi buy dimis. Dimis ngi gujuvur.

² Aw Buymisemuŋ, migi kiita ɗu mijeŋŋe! Da ya mira ziluw na, ziliy mi. Ya misi ar bonoy na, ki cukiy le. Puriy ircece, cine diradibiɗ ɗu takwa.

³ Kayya mizli, kum mapuraka dudok ɗu hiris le, kum mawuɗam jikiy ɓi gbiŋ lambaˀ, yo kum mawuɗam gi slir lambaˀ lambaˀ na, kisa kiɗaka mi naŋ, hã ti vunaka?

⁴ Sinaka sin le, Bumbulvuŋ a gwaha mbur naŋ miteŋteŋ le gwah pal. Da ya mira zila Bumbulvuŋ na, a ciniy di.

⁵ Da mevel ara jukum na, ki gam di malambaˀ ta. Kum mutup ar li hin kum na, wulkam, amma ndiram teˀ teˀe.

⁶ Gaka mikuli kaɓa miɓaka ɗaˀ le na, yo pulaka vu kumo da Bumbulvuŋ.

⁷ Mizli haɗa ara cufuɗam vu: «Masa ga ndra ɓa i mumulom i waka?» Bumbulvuŋ, ciɗiko mihiri ɗike njahha ng'ar ndra.

⁸ Ki vuliy mumul le haɗa a mevele, fineˀ ngi mizli magam sifi ngi alkamari ati ngi yi ngi gudubun.

⁹ Da ya mihin le si na, i hinje zuy zuy, asi mike na, Bumbulvuŋ, maga ɓa yi ndir setette na, i ka pal ɗike.