DIMISEY 37 - Bible en langue guiziga

Da mbur misi moˀore, a gi gwat, a luuma le na, ki ji di mevel ta

¹ Dimis ngi wuzla dimis ngi Davitey. Ki ji mevel angi mbur misi moˀore ta, ki gi suloŋ ti mbur migi gwat malambaˀa ta.

² Asi a sa guvuˀom kutum ka giziŋ, yo a sa muˀulom kutum kakalafa.

³ Njih hiri njah asi Bumbulvuŋ, yo ga gwata kuy kuy, ɓa ki cifi asi ruwuyo, ki ndir zuy zuy.

⁴ Mumul avu Bumbulvuŋ, a sa vuluw gwat ngi si mevel ɗike.

⁵ Mbiɗi, aru ngir ti vu Bumbulvuŋ, njih hiri njah aseˀeŋ, a sa guw gwat mezleŋ.

⁶ A sa bugo gi jeŋŋe ɗike dizze kaɓa pas mabawa, yo gi kaslsla ɗike kwana, kaɗaŋ kaɗaŋ kaɓa pas deŋ.

⁷ Cifi teˀ teˀ a mbuŋ Bumbulvuŋ, ɗuva wuluko taˀ angaŋ. Mbur migi gwat le gu na, ki gi fõh fõh anga ta, mbur magi gwat ti wer na, ki gi fõh fõh anga ta.

⁸ Pula ji mevele, pula slikiɗa himaˀ, ki gi fõh fõh ta, naɓa a sa kiɗ mi ti malambaˀa.

⁹ Asi a sa ngizlaka misi moˀoreheye, amma mizli manjaham hiri asi Bumbulvuŋ na, hirwuyo, a sa so inga taŋ.

¹⁰ Neˀ nga mbuŋ aka na, mbur miziriɗa mi anta mata, ki sipi, ki sipi, amma ko sar naŋ a ruwuy tekeɗe kwana, ki lum ta.

¹¹ Amma mizli mihina hirngahaya, hirwuy a sa so inga taŋ. A sa lumam zuy migisiŋ gisiŋ naŋ, a sa mumulom ara.

¹² Mbur miziriɗa mi ngi Bumbulvuŋ, ara gi wer ngi ziza mbur mijeŋŋe, ara humbuɗ sliŋ ng'araŋ.

¹³ Amma Bumbulvuŋ ara singir angi mbur maziriɗaŋ mi, asi Bumbulvuŋ ara pura, hin ngi pula cuwal naŋ ara ndilawa.

¹⁴ Mizli miziriɗa miheye, a muɗoko maslalama, a hilaka leke, ɓa ngi kiɗa mbur mihina hirnga waɗ misi murga, ɓa ngi sla ˀay ngi mbur magi gwat ti jiviɗ naŋ.

¹⁵ Amma maslalam taŋ a sa zligi mevel taŋ tehhe a muŋ, yo lek taŋhay a sa ngilam.

¹⁶ Gwat mineˀ ngi mbur mijeŋŋe na, a funa zlili mihaɗa ngi mizli miziriɗa mihey mbeˀ mbeˀe.

¹⁷ Asi gidaŋ ngi mizli miziriɗa miheye, a sa tiki, amma Bumbulvuŋ a jaha mizli mijeŋŋeheye, ɓa a ndiram gidaŋ gidaŋ.

¹⁸ Bumbulvuŋ a si na hin ngi mizli mikaslslahaya le, yo zlili taŋ a sa ndir ngi caˀa.

¹⁹ Ar bonoyo anta sa ndiram mesem mesem ta, yo ar hin ngi maya, a sa mbam.

²⁰ Mizli miziriɗa miheye, a sa zizam, yo mesene ngi Bumbulvuŋhoyo taŋ kaɓa mufuyuk ngi ɓuhoy, a sa susuymom kaɓa cunju.

²¹ Mbur miziriɗa mi a didiɗ gwata, a wurka ta, amma mbur mijeŋŋe, a pur ircece, yo a vul.

²² Hirwuy a sa ndir da mizli Bumbulvuŋ maɗuwla taŋ mi, yo mizli naŋ manisa taŋ na, a sa kiɗam hilfa.

²³ Da gwat ngi gi ngi mburo, a cira hiri le da Bumbulvuŋ na, Bumbulvuŋ a jinaŋ ar siifa naŋ, ɓa aru nga mbuŋ nga mbuŋ manja zluwun.

²⁴ Da ko sar a baŋ le kwana, naŋ anta diɗ ta, asi Bumbulvuŋ a jaŋ le kaw avu haŋ.

²⁵ Diga gawla ɗu, hã i gi midigila, mbur mijeŋŋe mupula le fuk na, ko i lum ɗaˀ ta ndiɗaˀ wãˀ, yo dideˀ naŋhay kwana, ko anta a sukom gwat ngi zumo ti suk ta.

²⁶ Vur hin gar na, mbur mijeŋŋe a pur ircece, a vul duvusu, joˀ dideˀ naŋhay a sa ndiram i muɗuwula mihey le.

²⁷ Pula gi malambaˀa kileŋ, gi mezleŋ, naɓa kisa lum li cifi asi ruwuyo ndrehhe.

²⁸ Asi Bumbulvuŋ a wuɗ gi gwat misi ti jiviɗ naŋ, anta pula mizli miteŋteŋ naŋhaya zlaɗ ta. A ra wi taŋ vu ndrehhe, amma a sa ngizla sukwi ngi mizli maziriɗakaŋ miheye.

²⁹ Hirwuy a sa ndir da mizli mijeŋŋehey, taŋ a sa cifam anga ndrehhe.

³⁰ Mi ngi mbur mijeŋŋe, a ɓi di i ɓi ngi sinmijileŋ, yo irne naŋ, a ɓi di i ɓimujuwa mitaˀ gar.

³¹ Asi ɓi, Bumbulvuŋ naŋ mujuwa, naŋ da a mevele. Sar naŋ, naŋ maɗuva, naŋ luɓuw luɓuw ta.

³² Mizli miziriɗa mi ngi Bumbulvuŋhoyo, ara cikiɗaka mbur mijeŋŋe, yo ara puram jiviɗ, ɓa a kiɗaka vagay.

³³ Amma Bumbulvuŋ anta pula asi haŋ taŋ ta, ar kiita na, anta pulaŋ ɓa a jakaŋ ta.

³⁴ Njih hiri njah asi Bumbulvuŋ, yo zuɓa jiviɗ naŋ. A sa ɗuvuw hirnga, ɓa ruwuy a ndir da ka, joˀ kisa pura masa ngizlaka miziriɗa miheye.

³⁵ Yi pur mbur miziriɗa mi le, maga gwata gaɗay gaɗay le, yo a cici le zlak gidaŋ gidaŋ kaɓa widis mutukuzo.

³⁶ Amma a cuh le, naŋ anta mata, i pura, i pura na, i luuma mata.

³⁷ Singila mbur mijeŋŋe, pura mbur magi gwat ti jiviɗ naŋ, mbur mawuɗ zuyo a sa ji haɗi.

³⁸ Amma mizli misli himaˀhaya, a ngizlaka taŋ le arleˀe, yo a kiɗaka hilfa ngi tizer ngi miziriɗa miheye le.

³⁹ - Malaha mizli mijeŋŋeheye, i Bumbulvuŋ, ar pas ngi mendere na, naŋ i li taŋ muguno ti mohol.

⁴⁰ Bumbulvuŋ a jina taŋ, yo a cuko taŋ ar bonoyo, a cuko taŋ avu miziriɗa miheye, yo a laha taŋ, asi a tiram di le, i li ɗum taŋ.