DIMISEY 36 - Bible en langue guiziga

Bumbulvuŋ, miviɗiviɗi ngi siifa naŋ avu ka

¹ Dimis ngi wuzla dimis ngi Davit, gawla ngi Bumbulvuŋ. I mulumo di ar ɗerewol ngi buy dimis.

² Mingiɓi malambaˀ ngi mbur misi moˀore, ara so keŋ a hirnga ɗu, avu naŋ na, ɓi ngi zluwun ti Buymisemuŋ anta.

³ A ɓi ɓi mezle vur vu naŋ haɗi, ɓa a lum malambaˀ ava, yo ɓa a hirsa vu naŋ na, anta.

⁴ Mingiɓi naŋ maɓa, i slir ati tikina vu tewle, a si na wala ngi gi mezle mata.

⁵ Malambaˀ naŋ maga na, a wulka tup ar li hin naŋ, i jiviɗ mezle ta kwana, a sipa si, anta pula gi malambaˀa ta.

⁶ Bumbulvuŋ, gi mezle ɗike, naŋ haɗa kite muŋ, gi teŋteŋ ɗike, aru sesẽŋ avu gazlavay.

⁷ Jeŋŋe ɗike naŋ madiɗakaɓa muwã madiɗahay, yo gi kiita ɗike, naŋ jileŋ kaɓa mubuliy mijileŋ. Bumbulvuŋ, ki ra laha mizli ati gwat misãmiheye.

⁸ Gi teŋteŋ ɗike, naŋ puɗaw wãˀ Buymisemuŋ! Mizli a ɗumom asi kirpasl ɗiki.

⁹ A hay ɗike, ara mbam hã fineˀ gidaŋ ti gwat ngi zum mundumoy, yo ki ra vula taŋ gwat mundum ɗikey kaɓa yam ar mizaw madiɗaŋ.

¹⁰ Asi miviɗiviɗi ngi siifa naŋ avu ka, ndra mapuraka li njahha na, mbele li minjahha ɗiki.

¹¹ Mizli masinukuw na, gi teŋteŋ avu taŋ nga mbuŋ nga mbuŋ, yo misi mevel purlahay na, ga taŋ jeŋŋe ɗiki.

¹² Anja mbur mahuhum vu, a ɗuv sar taˀ le a hay ɗu ta, anja ki pula mukuwahay a ɓulikiy ta.

¹³ A hay ɗike, migi gwat malambaˀhaya, a ndilam le, ko a slikiɗam gu ta.