DIMISEY 35 - Bible en langue guiziga

Mbur migi gwat ta matumbulo Bumbulvuŋ, asi a tikakaŋ ˀay le ng'ar kiita

¹ Dimis ngi wuzla dimis ngi Davitey. Aw Bumbulvuŋ ɗu, tiri mesene ngi mesene ɗuwoy, zla kiɗa vu ati mizli mazlikiy ngi kiɗa vu na!

² Zuɓa mbaraya, ka libiti ɗike, slikiɗ, kilo widi ɗu.

³ Puka ziwite, tika jiviɗ ngi mizli masipikiy na, ɓiy: «Y'ani lihuw!»

⁴ Mizli mawuɗam muc ɗu na, anja a pam mesem, busukum ngi vi dangwal taŋ a diɗi! Mizli mawuɗam ɓa bonoy a lumiy na, anja a mam murdirba ti mesem!

⁵ Tapas modro ngi Bumbulvuŋ masa ɓula taŋ na, anja a tiram kaɓa cekwesl, himiɗ makil di!

⁶ Tapas modro ngi Bumbulvuŋ masa gidiɗa taŋ na, anja luvuŋ a gi a jiviɗ taŋ, yo a slir ŋkek ŋkek!

⁷ Manja i gi gwata si na, a ngam ngamngam, ɓa a jikiy, manja i gi gwata si na, a lam vigiɗ leˀ leˀ sirit hirnga nah, ɓa yi diɗ ng'araŋ.

⁸ Anja ɓi malambaˀ muwãˀ a luuma taŋ gurjiki, anja ngamngam, taŋ ming'aka ɗum ti haŋ taŋ na, a ji i taŋ tehhe a muŋ, yo anja a cam ar ɓi malambaˀ muwãˀ nah vuna.

⁹ Dar yi zluzluɓ mbele Bumbulvuŋ, yi mumul asi ya milih na.

¹⁰ Dum vu ɗu gar a sa ɓi: «Bumbulvuŋ, misi kaɓa ka i waka? Ki laha mbur mihina hirnga avu mbur migidaŋ fineˀ naŋ, mbur mihina hirnga ati misi murga, ki laha taŋ avu mbur mazuma taŋ gwataya.»

¹¹ Sedewo misi slirey, a slikiɗam, a cufuɗikiy ar gwat ya misina ta.

¹² Ya, yi gi mezleŋ, a mikiy di ti malambaˀ, y'ani ɗoɗok pal ɗu ani.

¹³ Hirak ti mesene ɗuwoy muroko ti jiji na, yi ki zana ngi vagay, i ro luɓ luɓ a mbuŋ Bumbulvuŋ ti gi dalyam, yo diradibiɗ ɗu, i mahiri nah, i mahiri nah.

¹⁴ I ndir deŋ ti deŋ a jiviɗe, kaɓa vur ngama ɗu malla vur sukum ɗu, hiri ndirɓiɓɓe, yo hirnga jik a ruwuy kaɓa mbur ar vagay ngi mumuŋ.

¹⁵ Da sar a biy le na, a cikilam, a singiram ar ya: misi blehey a jumom angi ya, vur mike na, yi si na ta, anta taˀaka widi teˀ le ta.

¹⁶ Taŋ mapurikiy ya madiɗ na, a singiram ti gidaŋ, a humbuɗam sliŋ ng'ar ya.

¹⁷ Bumbulvuŋ, ki pur ti puro si hã ti vunaka? Lihiy siifa ɗu avu bonoy madiɗa hana, waɗ deŋ ɗu avu mizli migi malambaˀ kaɓa mobor hanayna.

¹⁸ I sa guw sise a wuzla kus madiɗaŋ, i sa hunumuw a wuzla zigiduw.

¹⁹ Mizli mawuɗam a gikiy malambaˀ na, anja a gam ti ya dungur ta, mizli mahirsikiy ngatara na, anja a kuɓucom hiri angi ya ta.

²⁰ Mingiɓi magi vu zuyyo anta avu taŋ ta ndiɗaˀ, a jam ɓi gbiŋ gbiŋ lambaˀ da mizli ngi si ruwuyoy muroko setette.

²¹ Mi ngar ngar ng'ar ya, a ɓam: «Hã hãhh! I lumaka le kasl so.»

²² Bumbulvuŋ, ki pura le ti hiri ɗike, ki cifi teˀ teˀ ta! Bumbulvuŋ, ki buˀ kileŋ avu ya ta!

²³ Aw Bumbulvuŋ ɗu, Buymisemuŋ, slikiɗ, giy kiita ɗu, yo cik vu ar ya.

²⁴ Bumbulvuŋ ɗu, Buymisemuŋ, giy kiita ɗu weˀe avu gi jeŋŋe ɗiki, yo anja a gam ti ya dungur ta.

²⁵ A ɓam: «Hã hãhh! I caka balam purla si,» anja a ɓam ta. A ɓam: «I ndaka le si,» anja a ɓam ta.

²⁶ Mizli mamumulom zleˀe vur ya misi angi bonoy na, anja mesem a ga taŋ gar taŋ! Mizli mapikiy hirnga zleˀe na, anja mesem a sirta taŋ sirit, yo busukum ngi vi dangwal taŋ a diɗi!

²⁷ Mizli mawuɗam zleˀe yi ci ar ɓi ta na, a sa jam salalay, a sa ɓam: «Bumbulvuŋ naŋ gidaŋ, a wuɗ le ɓa gawla naŋ a pul vu.» A maka hiri nah, a maka hiri nah.

²⁸ Dar yi sa ɓa ɓi ngi gi jeŋŋe ɗike, yo i hunumuw vur hin gar.