DIMISEY 34 - Bible en langue guiziga

Bumbulvuŋ a lihiy le avu zluwunoyo gar

¹ Dimis ngi wuzla dimis ngi Davitey. A mbuŋ Abimeleke, Davit a gi ka mibirngaŋ. A dirba Abimelek muɓulaŋ na, Davit a ɓi ani:

² I wuɗ i ga sise da Bumbulvuŋ angi pas wanaka gar, anja i taˀa hunum naŋ avu mi ɗu teˀ le ta.

³ I ra jijih asi Bumbulvuŋ, anja mizli muluɓ luɓoy macinam ya mahunumaŋ na, a mumulom.

⁴ Gukum dudok da Bumbulvuŋ bummoˀ, hunumukum di jom arleˀeŋ.

⁵ I cufuɗa Bumbulvuŋ le, a ziliy mi, a lihiy le avu gwat ngi muɗa didakaya gar.

⁶ Mizli maɗuvam hiri ngir ti va gar na, ara mumulom, yo mesem anta a mihiri taŋ mata.

⁷ Da mbur muvuso, a zila Bumbulvuŋ le na, Bumbulvuŋ a cinaŋ di, a lahaŋ avu bonoy naŋhaya gar.

⁸ Modro ngi Bumbulvuŋ ara jigina mizli mazluwunam ti Bumbulvuŋ, yo ara laha taŋ.

⁹ Puraka ayɗi! Kay! Bumbulvuŋ naŋ mezle haɗi teˀe, i ngi hiyĩ. Mbur misi li ɗum naŋ i Bumbulvuŋ na, a mumul!

¹⁰ Kum mizli ngi Bumbulvuŋhay na, zluwunam di, asi gwat mafucuka mizli mazluwunam di anta.

¹¹ Moboroy kwana, may gwat ada avu taŋ, yo may a ja taŋ, amma mizli masipaka Bumbulvuŋ na, gwat mafucuka taŋ anta.

¹² Ziri ɗuwoy, soko cinam ɓi ɗu! I sa dubunukum ɗuva hirnga da Bumbulvuŋ.

¹³ Da mbur a wuɗ siifa naŋ le, yo a wuɗ le ɓa a pura hin ngi mumulo na,

¹⁴ anja a jigina irne naŋ avu ɓi malambaˀa, a jigina mi naŋ avu gi mbaɗa,

¹⁵ yo a jigina vu naŋ avu malambaˀa, a gi mezleŋ, a sipa jiviɗ ngi cifi zuy zuyo gǝr gǝr.

¹⁶ Bumbulvuŋ a ro hiri taˀ angi mizli mijeŋŋhey, yo slimiɗ jakka ngi cine widi taŋ.

¹⁷ Bumbulvuŋ a zlir dibiɗ ti mizli migi malambaˀhaya, ɓa a susuyumo slimiɗ taŋ asi ruwuy avra.

¹⁸ Da mizli mijeŋŋehey ara wudam na, Bumbulvuŋ a cina, dar a laha taŋ avu bonoy taŋhaya gar.

¹⁹ Bumbulvuŋ naŋ da gweˀ avu mizli misi didak ara muɗa taŋ, yo mizli misi mevel anta ar haya mata na, a laha taŋ.

²⁰ Mbur mijeŋŋe, bonoy ava haɗi, avu bonoy gar na, Bumbulvuŋ ara lahaŋ.

²¹ A ra ki slimiɗ ar tesl ngi dumvu naŋ gar, ɓa ko purla a ngil ta.

²² Bonoy a sa kiɗa mbur misi moˀore, mbur mijeŋŋe, a sa kutaka mesene naŋhaya ti bonoy.

²³ Bumbulvuŋ ara mbiɗa hirnga ngi siifa ngi gawla naŋhaya. Mbur misi li ɗum naŋ ava gar na, ko loŋ masa kutakaŋ ti bonoy anta.