DIMISEY 31 - Bible en langue guiziga

Bumbulvuŋ, ka ki li pula vu ɗu

¹ Dimis ngi wuzla ngi dimis ngi Davitey. I mulumo di ar ɗerewol ngi buy dimis.

² Bumbulvuŋ ɗu, i tiri ti ka li ɗum ɗu le, anja ki puliy mesem mesem ta ndiɗaˀ wãˀ, pusukiy ti gi jeŋŋe ɗik na.

³ Jiko slimiɗ ng'avi ya! So lihiy kutum. Tiri mandazlay muwã ɗu migidaŋ, ki li ɗu malihiy, li ɗu muguno ti mohol.

⁴ Ka ki mandazlay muwã ɗu waɗ li ɗu muguno ti mohol. Kisiy, yo bigiy jiviɗ ngi hunumuw tehhe a muŋ.

⁵ Ki sa zuɓa ngamngam ming'aka ngi ji ɗu avra, asi ki li ɗu muguno ti mohol.

⁶ I ra pula musuwun ɗu asi haŋ ɗik Bumbulvuŋ. Ka Bumbulvuŋ mikaslsla, Buymisemuŋ, ki mbiɗiy hirnga ɗu le.

⁷ I hirsa mizli mahuruk hurukam a mbuŋ kuliheye, ya, yi njih hiri asi Bumbulvuŋ.

⁸ Yi zluzluɓ asi gi teŋteŋ ɗike, asi ki pura bonoy ɗu le, yo ki si na ya maduhur na le.

⁹ Ki puliy asi haŋ ngi mesene ɗu ta, ki ciciy le deŋ gidaŋ gidaŋ, yo ki tiri ti ya diimu le.

¹⁰ Bumbulvuŋ ɗu, puriy ircece takwa! I ra duhur. Bonoy ara zumiy hiri ati mumburlok waɗ kwacaya.

¹¹ Siifa ɗu ara kiɗ mi ti ndurɓo hiri, vi ɗu gar a kiɗ mi ti niˀici. I ra hĩhĩy, yo i zih le njelel wãˀ, asi ya migi mungra.

¹² Mesene ɗuwoy gar ara zikiy, midigwi ɗuwoyo gaɗay gaɗay le wãˀ ma, ngama ɗuwoyo, a zluwunam ti ya, taŋ mupurikiy le avra na, a kilam ti ya.

¹³ A sinikiy mata, a puyukom ti ya hirnga le, kaɓa mapuyukom hirnga ti mbur mumuca, yo ya ɓaˀ lambaˀ kaɓa holyom.

¹⁴ I ra cine mizli maɓikiy cococo, a ɓam: «I ra ga zluwun da mizli gar.» A jumom ˀay le gar ng'ar ya, ara gam gidiɓi ar ya ɓa a zizikiy.

¹⁵ Amma yi ra njih hiri asi ka, Bumbulvuŋ. Yi ɓi: «Buymisemuŋ ɗu i ka.»

¹⁶ Siifa ɗu a ro kaw ndrehhe asi haŋ ɗiki, lihiy avu mesene ɗuwoy mufõh fõh ng'ar ya na!

¹⁷ Puriy ya gawla ɗike ti hiri mezleŋ, lihiy ti gi teŋteŋ ɗiki.

¹⁸ Bumbulvuŋ ɗu, ya muziluw na, ki puliy mesem mesem ta! Amma anja misi moˀoreheye, a ndiram mesem mesem ɓula, yo a ndiram siriw ka mumucahay.

¹⁹ Misi slir tayna, maɓam ɓi malambaˀ ngi kuw angi mbur mijeŋŋe, yo mahuhumom vu, waɗ mahirsam vu na, anja a ɓam gu ta.

²⁰ Gi mezle ɗik, ka mawi taŋ vu da mizli mazluwunam ti ka na, kay, naŋ haɗi teˀe! Mizli maɗumom avu ka gar na, ki ga taŋ mezle dik a mbuŋ mizli gar.

²¹ Ki ɗumo taŋ ɗum ar li ka misi araŋ, kileŋ avu jigina mi ngi mizli, ki wi taŋ vu weˀ avu irne malambaˀ ngi mizli.

²² Sise ngi ɗik Bumbulvuŋ ɗu, asi ki giy cekene le da ya ti gi teŋteŋ ɗik na, ar walahay muguno le ti vurum.

²³ Ti di nah na, lesl a giy welele, i ɓi: «Yi muɓula le a mihiri ɗike.» Amma ya mitiluw mi ti tumbul na, ki cine ˀay ɗu le.

²⁴ Kum mizli miteŋteŋ ngi Bumbulvuŋhoy, wuɗakaŋ! Bumbulvuŋ ara wi vu ti mitiɓiheye sek pal, amma a ga kiita mutuwaˀ da mbur mahuhum vu.

²⁵ Kum gar muɗuvaka wuluk le taˀ ar Bumbulvuŋ na, cicam gidaŋ gidaŋ, yo tumom vu tum.