DIMISEY 29 - Bible en langue guizigaˀAy ngi Bumbulvuŋ 1 Dimis ngi wuzla ngi dimis ngi Davitey. Kum gidaŋ ngi muŋhoy, ɗuvaka hirnga da Bumbulvuŋ, tilam mi ti ɓi ngi dudok naŋ waɗ ti ɓi ngi gidaŋ naŋ! 2 Tilam mi ti ɓi ngi dudok ngi Bumbulvuŋ! Da ara biga, naŋ i Bumbulvuŋ mipal na, a hurkom huruk huruk a mbuŋ naŋ. 3 ˀAy ngi Bumbulvuŋ a tikaˀay da yamaya, Bumbulvuŋ misi dudoko, a ga ɓa vuŋ a ndisli, Bumbulvuŋ a tikaˀay le da yam madiɗahaya. 4 ˀAy ngi Bumbulvuŋ a cin ti gidaŋ, Bumbulvuŋ a buc buc ngi buyoy. 5 ˀAy ngi Bumbulvuŋ a ngila mitereye. Bumbulvuŋ a ngila miter ngi Libaŋhaya. 6 A ga ɓa ruwuy Libaŋ a jiɗ paŋ paŋ kaɓa zuŋ sla, yo ɓa muwã Hermoŋ a jiɗ kaɓa gawla mbana. 7 ˀAy ngi Bumbulvuŋ a bo irne vu njilim njilim. 8 ˀAy ngi Bumbulvuŋ a jijika wuzlaɓuh mikirɗak kirɗaka, Bumbulvuŋ a jijika wuzlaɓuh mikirɗak kirɗak ngi Kadese. 9 ˀAy ngi Bumbulvuŋ a jijika muuni misi ti huroyo, ɓa a yam, a pakalaf ngi widis mingiriɗe avra. Mizli gar a ɓam a hay Bumbulvuŋ: «Dudok da Bumbulvuŋ!» 10 Bumbulvuŋ a ro ar mekepel, ara zum buy. Bumbulvuŋ a ro ar janga naŋ, i buy madiɗa ngi sete. 11 Bumbulvuŋ a vula gidaŋ da mizli naŋhaya, Bumbulvuŋ a ɗuwula mi da mizli naŋhaya, a vula taŋ jam. |
Bible en Langue Guiziga © L’Alliance Biblique du Cameroun, 2011.
Bible Society of Cameroon