DIMISEY 21 - Bible en langue guiziga

Buy madiɗa a njih hiri asi Bumbulvuŋ gu

¹ Dimis ngi wuzla dimis ngi Davitey. I mulumo di ar ɗerewol ngi buy dimis.

² Bumbulvuŋ, buy madiɗa ara mumul asi gidaŋ ka muvulaŋ di na. Kay! ka miga ɓa a lum bugawla na, a mumul haɗi teˀe.

³ Ki kiɗaŋ may ngi gwat, naŋ mawuɗ a mevele le, gwat naŋ macufuɗ avu ka na, ki tik di vu ta.

⁴ Ki so ng'avaŋ, ɓa ki ɗuwulaŋ mi haɗa, ki tuwuɗaŋ hirnga ti loppol ngi ɓiri tapasl tapasl.

⁵ A cufuɗ siifa avu ka, ki vulaŋ di le, yo ki jaŋ hutuŋ subur.

⁶ A lum dudok haɗi mbele ka mijinaŋ. Ki sirtaŋ le sirit ti kuy waɗ ti ɗongor.

⁷ Ki tiri di mbur muɗuwulaŋ mi le ngi caˀa, naŋ misi a mihiri ɗik na, ki gaŋ mumul.

⁸ Haˀaw, buy madiɗa ara njih hiri asi Bumbulvuŋ, yo Buy Mimadiɗa, ara cicaŋ gidaŋ gidaŋ ti gi teŋteŋ naŋ.

⁹ Ki ra ja mesene ɗikeye cesl cesl ti haŋ ɗiki, yo mizli mawuɗam ɓi ɗik tahaya, ki ra ja taŋ ti gidaŋ ɗiki.

¹⁰ Ti ka masa bugo vu na, kisa ɗiyi taŋ vu mihilɓiɓi. Bumbulvuŋ, kisa susuyumo taŋ ti himaˀ ɗiki, yo vu a sa zuma taŋ pay.

¹¹ Ki sa kiɗa tizer taŋ asi ruwuy avra, yo kisa susuyumo sukwi taŋ a wuzla mizli avra.

¹² Da ara wuɗam a gukuw malambaˀ, yo ara gam gidiɓi ar ka na, ko anta gukuw di gu ta wãˀ.

¹³ Asi ki ra gidiɗa taŋ ti luvutu. Ki mula puɗak ng'ar taŋ.

¹⁴ Bumbulvuŋ, cici zlak ti gidaŋ ɗike! Ndr'i hunumukuw ti dimisi, vur gwat madiɗahay ka miga taŋ na.