DIMISEY 147 - Bible en langue guiziga

Gidaŋ ngi Buymisemuŋ ar gwat ngir duniya waɗ ar ɓi macuh

¹ Haleluya, yawwa Bumbulvuŋ. Naŋ kuy ɓa i hunumaka Buymisemuŋ ndra ti dimise, naŋ mezle ɓa i hunumakaŋ, asi a ndila le!

² Bumbulvuŋ a ndira Zeruzaleme hiri naŋ a muŋ, a cukulo hirnga ngi Israyel muɓulahay i a muŋ.

³ I naŋ maɗiya mizli misi didak mamuɗa taŋ, a mbuza taŋ waˀahaya.

⁴ I naŋ maslufa wurzlaŋhaya ma, a ca taŋ slimiɗe tiɗeˀe.

⁵ Buymisemuŋ ndra, naŋ madiɗaŋ, yo naŋ gidaŋ haɗa, sin nga naŋ anta kiɗ mi ta.

⁶ Bumbulvuŋ a jina mizli muluɓ luɓoyo, amma misi moˀoreheye, a mataŋ a ruwuy wãˀ.

⁷ Gaka sise da Bumbulvuŋ ti dimis, hunumaka Buymisemuŋ ndra ti garaya.

⁸ Masirta muŋ ti gazlavay i naŋ, mazuɓo vuŋ ɓa a gi asi ruwuyo i naŋ, yo a ga ɓa giziŋ a pus ar muwãhaya.

⁹ A vula giziŋ da ginewey, waɗ da ziri magagakay matuwam maya.

¹⁰ Gidaŋ ngi pilise, a caŋ ta, yo mbur mapi mi ti kile, a caŋ ta ma.

¹¹ Amma Bumbulvuŋ a hiyĩ di i mizli masinakaŋ, manjaham hiri njah asi gi teŋteŋ naŋ.

¹² Zeruzalem, ga dudok da Bumbulvuŋ! Siyoŋ, hunuma Buymisemuŋ ɗike.

¹³ Asi a gica miviŋ ɗike le gidaŋ gidaŋ ti faɓuru, a ɗuwula mi le da ziri mizile ngi hay ɗikeye.

¹⁴ A ra jigina hirwuy ɗike, ɓa a cifi jam jam, a vuluw daw mezle hã ki mbi.

¹⁵ Buymisemuŋ a ɓo mingiɓi naŋ ɗaˀ asi ruwuyo, a zlira li zlar kutum.

¹⁶ Dar a po yam buk buk babara ndazl kaɓa ngwic ngi tumuŋ, a pa pik pik, sirit hirwuyo kaɓa mafutom fucu.

¹⁷ A zliɗo yam muloˀ loˀ, kurtototo, mbur maɓusa himiɗ naŋ gu anta.

¹⁸ A ɓo ɗaˀ purla si na, yam a susuyum, a go himiɗ vir vir, joˀ mizaway a ɓulom kol kol.

¹⁹ A til mi ti mingiɓi naŋ da Zakop, ɓi naŋ mawuɗ waɗ ɓi naŋ muɗuva na, a ɓa da Israyel.

²⁰ A gi gwat kahana da sukwi mekelemeye ɗaˀ ta, ko a sinaka ɓimuɗuva naŋhaya ta. Haleluya, yawwa Bumbulvuŋ.