DIMISEY 146 - Bible en langue guizigaBumbulvuŋ i micika vu a hirnga hĩhĩyahay 1 Haleluya, yawwa Bumbulvuŋ! I wuɗ i ga dudok da Bumbulvuŋ! 2 I wuɗ i ga dudok da Bumbulvuŋ ar siifa ɗu gar. Ya misi ada aruŋ na, i hunuma Buymisemuŋ ɗu ti dimisi. 3 Ki njaham hiri asi mizli micawwahaya ta, taŋ i mizli ngataraŋhay malaham vu gu ta. 4 Da taŋ mumicam le na, a tiram murɓuk a muŋ, yo diga tapasa, a dikaka taŋ jom ati gwat taŋ muwulkaka zleˀe ngi gi. 5 Mbur misi mijini ˀis naŋ i Buymisemuŋ ngi Zakop, yo muɗuva wuluk naŋ le taˀ asi Bumbulvuŋ, Buymisemuŋ naŋ na, a mumul! 6 I Buymisemuŋ miga muŋ ati hirwuyo, mubuliy waɗ gwat ngi raˀahay gar. I njaham hiri njah ngi wãˀ aseˀe gu. 7 A ra ga jeŋŋe da mizli muguzuvuraˀahaya, ara vula gwat ngi zum da mizli muroko ti maya. Bumbulvuŋ ara laha mizli mujuwahaya. 8 Bumbulvuŋ ara wuna hiri ngi dangaraya, Bumbulvuŋ ara slikiɗa mizli mugurjoŋ gurjoŋhoyo cir cir, Bumbulvuŋ ara wuɗ mizli mijeŋŋeheye. 9 Bumbulvuŋ ara cik vu a hirnga mizli muɓulahaya, ara jaha wudiga ati mutuhoyo jah jah, Amma gwat mizli misi moˀorehey muwulkaka le ngi gi na, a hirya avra. 10 Siyoŋ, Bumbulvuŋ i buy madiɗa ngi sete, i Buymisemuŋ ɗik ngi caˀa, ngi samadin. Haleluya, yawwa Bumbulvuŋ. |
Bible en Langue Guiziga © L’Alliance Biblique du Cameroun, 2011.
Bible Society of Cameroon