DIMISEY 143 - Bible en langue guiziga

Bumbulvuŋ, ki giy kiita ta

¹ Dimis ngi wuzla dimis ngi Davitey. Bumbulvuŋ, cine diradibiɗ ɗu, ya mira tumbuluw na, jiko slimiɗe. Ani ka miteŋteŋ, yo ka mijeŋŋe na, mbiɗiy di.

² Yi gawla ɗiki, ki giy kiita ta, asi ko mbur mijeŋŋe a mbuŋ ɗik anta.

³ Mesene ɗu ara sipiy nder nder, a zlumbiriy le, ara njirisliy, ara ci ti ya ng'ar luvuŋ ngi mizli mumucahay, nga wuzla mizli mumicam zlezle.

⁴ I hĩhĩy le wãˀ, gidaŋ ngi gi gwat neˀ anta avu ya mata.

⁵ I wulka hin mucohomoy zleˀe, i mahiri ngi ɓi ngi gwat ka miga taŋ cek, i wuluk ar slra ɗikeye.

⁶ I ra tiluw haŋ. Y'ani a mbuŋ ɗike, kaɓa hirwuy muˀulo mawuɗ yam.

⁷ Bumbulvuŋ, gidaŋ ɗu anta mata, wus vu, mbiɗiy di ayɗi. Ki mbiɗi duba avu ya ta, naɓa yi sa tiri rak rak ati mizli maka ka taŋ ng'ar vigiɗi.

⁸ Ɓiy ɓi ngi gi teŋteŋ ɗike zle timpriki, asi i ro hiri njah asi ka. Bigiy jiviɗ ngi sipi, asi i mbiɗi hiri le ng'avi ka.

⁹ Bumbulvuŋ, lihiy avu mesene ɗuwoyo, asi i ɗum le gweˀ avu ka.

¹⁰ Dubuniy gi gwat ngi si mevel ɗiki, asi ki Buymisemuŋ ɗu. Anja ˀUf ɗike, a kisiy tir mezleŋ, ng'ar li manja gwat ngi bi sar.

¹¹ Bumbulvuŋ, vuliy siifa, ɓa yi guw dudok ti zila slimiɗ ɗike. Ka mijeŋŋe na, bi ti ya tir bonoyo.

¹² Ka miteŋteŋ haɗa na, ngizla mesene ɗuwoyo, yo ziza mizli mazliram ti ya tahaya gar, asi yi gawla ɗiki.