DIMISEY 141 - Bible en langue guiziga

Bumbulvuŋ, jigina mingi ɓi ɗu

¹ Dimis ngi wuzla dimis ngi Davitey. Aw Bumbulvuŋ ɗu, i ra ziluw, wus vu, sawa jiniy, da ya mira ziluw na, jiko slimiɗ takwa.

² Anja diradibiɗ ɗu, aru cir cir ng'avi ka, kaɓa cunju ngi urdi mazlumaka ti zlum, yo anja haŋ ɗu mipaɗ a muŋ na, a tiri gwat ngi mikuli ngi pastaˀa.

³ Bumbulvuŋ, jigina mi ɗu, jigina mi ngi balam ɗu.

⁴ Ki pula mingiɓi malambaˀ a bo tir mevel ɗu ta, anja ko i pula vu ɗu ngi gi moˀore jom ati migi malambaˀhaya ta. Tikiy, ɓa i ci ar gwat ngi gi ngi si mevel taŋ na ta.

⁵ Da mbur mijeŋŋe ara kiɗiy, malla ara buciy asi naŋ miteŋteŋ avu Buymisemuŋ na, i tiɓaŋ. Amma gi gwat ngi misi moˀoreheye, y'anta wuɗ ta, anta tika diradibiɗ ɗu ta.

⁶ Ti taŋ masa buɗuslaka buy taŋhaya da muwã na, mesene ɗuwoy a sa sinaka, ya i ɓi di i ɓi mikaslsla, i ɓi:

⁷ «Li ngi mizli mumucahaya, a sa wuna mi kaɓa budugum, ɓa a nda tesl taŋhay mizlaɗ zlaɗ na.»

⁸ I mbiɗa hiri le ng'avi ka Bumbulvuŋ, Buymisemuŋ ɗu, i ro ɗum avu ka, ki puliy i muc ta.

⁹ Jiginiy avu mazaɓ ming'aka vur ya na, waɗ avu pihiri ngi mizli malambaˀ tayna.

¹⁰ Anja misi moˀorehey a cam ng'ar mazaɓ taŋ tehhe a muŋ, amma ya, yi bi njiraŋ ɓula.