DIMISEY 139 - Bible en langue guiziga

Bumbulvuŋ, ki si na gwat ngi gi ɗu le gar

¹ Dimis ngi wuzla dimis ngi Davitey. I mulumo di ar ɗerewol ngi buy dimis. Bumbulvuŋ, hiri ɗike, a pur sesẽŋ a mevel ɗu, yo ki si na gwat ngi gi ɗu le.

² Ya macifi, yo ya maslikiɗ gar na, ki si na le, ki si na wuluk ɗu le daf dumbuŋ zlezle si.

³ Liˀi ɗu ati hin ɗu kwana, ki ra singila taŋ, yo ki si na gwat ngi gi ɗu le gar.

⁴ Bumbulvuŋ, ɓa i sa wuna mi tikeˀe ngi ɓi ɓi na, naɓa ki si na ɓi nah le si.

⁵ Kˀada ti dirba ɗu, k'ada ti mbuŋ ɗu ma, ki ro haŋ bac ar ya.

⁶ Ka misiniy hãkahana na, naŋ kuy fineˀ gidaŋ, a funa gwat ya masla wala naŋ gu na le gar.

⁷ I cuh ng'ama, ɓa ya kileŋ avu ka naka? I kil ng'ama, ɓa ya kileŋ a mihiri ɗike naka?

⁸ Da i jiɗ ng'ama muŋ, k'ada a diga! Da i hin nga wuzla mumucahay, k'ani!

⁹ Ko da i slikiɗ fur, i ndil sesẽŋ asi pas mabawa, malla i ra cifi tisi pas madiɗ kwana,

¹⁰ ki ra sikiy haŋ ngi bigiy jiviɗ a diga ma, ki ro ti yakaw a haŋ hazum ɗike.

¹¹ Ko da i ɓi le: «Anja luvuŋ a sirtiy ngbulum, anja papas a tiri duvuɗ avu ya!» kwana,

¹² avu ka, luvuŋ a tiri li minjahha, yo duvuɗ a pusluɗ njahhaka papasa, avu ka, luvuŋ ati li minjahha i misi purlahay.

¹³ Migiy deŋ ti dumvu i ka, mikicuwiy a kwacay maha i ka.

¹⁴ Bumbulvuŋ, i guw sise, asi dumvu ɗu ka miga, a zum hirnga le. I si na le gisiŋ gisiŋ, gwat ka miga taŋ gar na, i gwat migam ɗaˀ tahay.

¹⁵ Ti ka mindiriy yaŋŋa, yo ti ka makilikiy klek klek a kwacay maha na, ki puriy le kweŋ kweŋ, gwat ngi dumvu ɗu muɗum avu ka anta.

¹⁶ Ya ma juɓ ti juɓ aruŋ na, ki puriy le si. Ka misliy hin ngi zik ɗu a ruwuy aka na, ki toho le cek ar ɗerewol ɗike si, naɓa hin pal a gi t'aruŋ ngbaŋ.

¹⁷ Aw Buymisemuŋ, gwat ka muwulka taŋ ngi geˀ, taŋ tuwaˀ haɗa avu ya, yo taŋ mbeˀ mbeˀe!

¹⁸ I slufa taŋ gu mbri mbrike? Taŋ haɗi fineˀ muyuŋ. Da ko i slufa taŋ le gar tekeɗe kwana, naɓa i tika sli wala ɗike t'aruŋ na si.

¹⁹ Aw Buymisemuŋ, da ki ngum na, ngizla misi moˀoreheye, yo ki ɓula mikiɗa hirngahaya kileŋ avu ya.

²⁰ Mizli mazliram ti ka tahaya, a zilaka slimiɗ ɗike ngi tikina mizli, yo a ɓaka ɓi ɗike ngi gi malambaˀa.

²¹ Bumbulvuŋ, mizli mahirsukuw na, i hirsa taŋ ta mbri mbrike? Mizli magam vurum ti ka na, i pura taŋ kuy mbri mbrike?

²² I hirsa taŋ gisiŋ gisiŋ wãˀ, a tiram le i mesene nga yahay.

²³ Aw Buymisemuŋ, pura jileŋ ngi mevel ɗu, yo siniy wãˀ, ci a kwacay ɗu, ɓa ki si na wuluk ɗu.

²⁴ Da ya ar jiviɗ nga zizi kwani, pura kuy kuy takwa, yo kisiy ng'ar jiviɗ ɗik mupurla misi zleˀe.