DIMISEY 135 - Bible en langue guiziga

Bumbulvuŋ naŋ madiɗaŋ, i si na le

¹ Haleluya, yawwa Bumbulvuŋ! Hunumaka Bumbulvuŋ ti slimiɗ naŋ, kum gawla naŋhay na, hunumakaŋ.

² Kum mideŋ deŋ ar hay ngi Bumbulvuŋ, kum mideŋ deŋ a wazlaray Buymisemuŋ ndra.

³ Hunumaka Bumbulvuŋ, asi naŋ mezleŋ! A wuɗ vu haɗa, hunumakaŋ ti dimisi.

⁴ Asi Bumbulvuŋ a wini di i Zakop, a tiri ti Israyele le, i mi nga naŋ.

⁵ Haˀaw, i si na le, Bumbulvuŋ naŋ madiɗaŋ, Bumbulvuŋ ndra a funa kuliheye le gar.

⁶ Bumbulvuŋ, gwat naŋ mawuɗ gar na, a ga le, gwat ngi muŋhoy ati ngi ruwuyoy, ngir mubuliyey malla ngir mijileŋ naŋhay.

⁷ A slikiɗo gazlavay tisi diˀise, a ga ɓa vuŋ a wucuɗ, ɓa a gi, yo a muɗo himiɗ naŋ miwidi vu zleˀe.

⁸ Mikiɗa ziri modogom ngi mizli jom ati ngi ginewey a Ezipte na, i naŋ.

⁹ A gi gwat mabigam gwatay waɗ gwat migam ɗaˀ tahay haɗi a hay kum a Ezipte, ti haŋ mijiviɗ naŋhay. A ga taŋ vur buy madiɗa ngi Ezipte ati gawla naŋhay gar.

¹⁰ A kiɗ sukwi ngi mizli le mbeˀ mbeˀe, a zizi buy madiɗa misi gidaŋhay le.

¹¹ I ti: Sihoŋ buy madiɗa ngi Amorihey ati Ok buy madiɗa ngi Basaŋ, waɗ buy madiɗa ngi ruwuy Kanaˀanay gar.

¹² Joˀ a vula hirwuy taŋ ka gwat ngi zuma hay, da Israyel, mizli naŋhay, ɓa a zumakaŋ.

¹³ Bumbulvuŋ, a zilaka slimiɗ ɗike ngi caˀa, Bumbulvuŋ, a ɓaka ɓi ɗike ngi set, ngi samadin.

¹⁴ Haˀaw, Bumbulvuŋ ara ga kiita da mizli naŋhaya, ara pura ircece da gawla naŋhaya.

¹⁵ Kuli ngi sukwi ngi mizli, ko da i ɓiri baraŋ malla i ɓiri tapasl tapasl tekeɗe kwana, i gwat mizli mipaka ti pi ngatara lambaˀ.

¹⁶ Mi ada avu taŋ ngbaŋ, amma anta ɓam ta, hiri ada avu taŋ ngbaŋ, amma anta puram ta,

¹⁷ slimiɗ ada avu taŋ ngbaŋ, amma anta cinam ta, zuŋ himiɗ fiɗek tekeɗe, anta bo ti balam taŋ ta.

¹⁸ Mizli mapam kuli ti ɓiri muluwuslahay, ati mizli manjaham hiri asi kuli tayna gar na, anja a ndiram rak rak ati kuli taŋhay vuna.

¹⁹ Sukwi Israyel, gaka sise da Bumbulvuŋ! Kum mizli ngi hay Aroŋhoy, gaka sise da Bumbulvuŋ.

²⁰ Kum mizli ngi hay Levihey, gaka sise da Bumbulvuŋ. Kum mizli mazluwunam ti Bumbulvuŋ, gaka sise da Bumbulvuŋ.

²¹ Bumbulvuŋ misi hay naŋ a Zeruzaleme, gakaŋ sise, zle a Siyoŋ! Haleluya, yawwa Bumbulvuŋ.