DIMISEY 132 - Bible en langue guiziga

Siyoŋ i hay ngi Bumbulvuŋ, yo i walahay madiɗa ngi Davit

¹ Dimis ngi zuɓa mulak nga diradibiɗ a Zeruzalem. Bumbulvuŋ, wuluk keŋ angi Davite, waɗ ar bonoy naŋ misa gar.

² Davit a hudum le a mbuŋ Bumbulvuŋ, yo Bumbulvuŋ ngi Zakop misi ti gidaŋ na, Davit a ɓaŋ le ɗaˀ le:

³ A ɓi na «y'anta i ci ng'ar guɗuk ɗu ta ndiɗaˀ, y'anta i hin ar arngawo ɗu ta ndiɗaˀ,

⁴ y'anta pula hiri ɗu a tiɗi ta ndiɗaˀ, ko y'anta hinje neˀ le ta ndiɗaˀ.

⁵ Sey da ya muluma li cifi le da Bumbulvuŋ ɗagay, yo ya muluma hay da Bumbulvuŋ migidaŋ ngi Zakopo le far!»

⁶ I cinam a ɓam na: akoti ngi Bumbulvuŋ naŋ a Efrata, i lumaka le ar prok ngi ruwuy Yaˀar:

⁷ Cukum ngi hay Bumbulvuŋ, yo hurukukum huruk a mbuŋ li ɗuva sar naŋ.

⁸ Bumbulvuŋ, slikiɗ, sawa ng'ar li musuka vu ɗike, ka ati akoti misi gidaŋ ɗik araŋ.

⁹ Jeŋŋe ɗik na, anja masay ɗik migi mikulihey a kaka avu vu kaɓa zana, anja mizli ɗikey miteŋteŋhey a jam salalay.

¹⁰ Mbur ka muwunaŋ ngi buy na, ki ɓula avra ta, tisi Davit gawla ɗik na.

¹¹ Bumbulvuŋ a hudum le vurˀe da Davite, gisiŋ, naŋ anta puska ɓi nah ta wãˀ, a ɓi na: «Masa cifi ngi zumabuy ar li ɗike, i zuŋ ngi kwacay ɗiki.

¹² Jumoˀay ɗu ati ziri ɗikey, waɗ ɓimuɗuva, ya masa dubuna taŋ di, da a jaka le a hirnga na, naɓa, masa zumam buy ar li ɗike, i dideˀ taŋhay vuna, hã ngi sete.»

¹³ Asi mike na, Bumbulvuŋ a wini di i Siyoŋ, a wuɗ Siyoŋ le ɓa a ndir i li cifi naŋ.

¹⁴ A ɓi na: «Li hana, i li musuka vu ɗu ngi wãˀa, i hĩyã le ɓa i sa pa hay ɗu anga.

¹⁵ Haˀaw, i sa ɗuwula mi da Siyoŋ, i vulaŋ gwat ngi zum haɗa, yo i sa mba misi murga ngi raˀahaya ti ɗaf ka taŋ mawuɗam.

¹⁶ Laha vu ɗu na, i saka da masay naŋhaya avu vu, joˀ mizli miteŋteŋ ngi raˀahaya, a sa jam salalay.

¹⁷ Buy migidaŋ, ya masa bo di tir tizer ngi Davite, i sa cifa a Siyoŋ, buy ya muwuna na, i sa ga ɓa zumabuy naŋ naŋ da kaɓa daliivu minjihhe.

¹⁸ I sa sirta mesene naŋhaya sirit ti mesem, amma naŋ, loppol ngi hirnga naŋ a sa wucuɗ deŋ.»