DIMISEY 122 - Bible en langue guiziga

Cufuɗa zuy vur Zeruzalem

¹ Dimis ngi wuzla dimis ngi Davitey, dimis ngi zuɓa mulak nga Zeruzalem. Taŋ miɓikiy: a kum ng'ar hay ngi Bumbulvuŋ na, kayya, i mumul di haɗi teˀe.

² Zeruzalem, i cicam le ani dedeŋ a mizlingre ɗike muduba so.

³ Zeruzalem, ka walahay mindira le mezle, muguno hirnga le kpiliŋ kpiliŋ ti mohol.

⁴ Sukwi Israyel wal wal, sukwi ngi mizli ngi Bumbulvuŋhoy mazuɓoko mulak na, ng'ar ka walahay Zeruzalem vuna, ɓa ngi hunuma Bumbulvuŋ, kaɓa masipaka jiviɗ naŋ angi hirwuy Israyel.

⁵ Asi janga ngi buyoy ngi gi kiita ada a diga, i buy ngir sukwi ngi Davitey.

⁶ Cufuɗam zuy vur Zeruzalem, ɓam: «Ka Zeruzaleme, anja ngama ɗikey a cifam setette.

⁷ Anja zuy a gi a hur walahaya, yo a hur hay ɗik mezlehey na kwana, mizli a ndiram setette.

⁸ Ya mawuɗ sukum ɗuwoy ati ngama ɗuwoy na, yi ɓuw Anja ki ndir zuy zuy.

⁹ Yi wuɗ cifi ɗike ar wuya na, vur hay ngi Bumbulvuŋ, Buymisemuŋ ndra.»