DIMISEY 118 - Bible en langue guiziga

Ndir ar siifa ti slufa ɓi ngi gwat Bumbulvuŋ migaŋ

¹ Hunumaka Bumbulvuŋ, asi naŋ mezleŋ, yo gi teŋteŋ naŋ na, naŋ da hã ngi sete.

² Sukwi Israyeley, maka hiri naŋ ava, ɓam: «Gi teŋteŋ ngi Bumbulvuŋ, naŋ da hã ngi sete!»

³ Dideˀ ngi Aroŋhoy, maka hiri naŋ ava, ɓam: «Gi teŋteŋ ngi Bumbulvuŋ, naŋ da hã ngi sete!»

⁴ Anja mizli mazluwunam ti Bumbulvuŋ a maka hiri naŋ ava, a ɓam: «Gi teŋteŋ ngi Bumbulvuŋ, naŋ da hã ngi sete!»

⁵ Ti ya misi ar bonoyo, i zila Bumbulvuŋ, a kilo widi ɗu, a tiri ti ya dimu.

⁶ Bumbulvuŋ inga ya, y'anta i zluwun ta, mizli a gikiy mi geˀ gu ka?

⁷ Bumbulvuŋ inga ya, naŋ da a kilo widi ɗu, i pura mesene ɗuwoyo ti dangwal ngi hiri.

⁸ Zuwen mbur maɗum ti Bumbulvuŋ, a funa naŋ manjih hiri asi mizli na le.

⁹ Zuwen mbur maɗum ti Bumbulvuŋ, a funa naŋ manjih hiri asi mizli madiɗahay na le.

¹⁰ Sukwi ngi mizli gar, a gunikiy hirnga le gun, i ngizla taŋ le, mbele Bumbulvuŋ.

¹¹ A gunikiy hirnga le gun gun zlar wãˀ, i ngizla taŋ le, mbele Bumbulvuŋ.

¹² A jupoko jap jap sirit ng'ar yakaɓa mamay, amma a kiɗam mi pas kutum si, kaɓa vu ngi gwaara, i ngizla taŋ le, mbele Bumbulvuŋ.

¹³ A pikiy haŋ le zleˀe ɓa i diɗi, amma Bumbulvuŋ a jiniy le.

¹⁴ Gidaŋ ɗu ati widi ɗu ngi vurumo, i Bumbulvuŋ! Sey i hunumaŋ ti dimis, asi mihiliy i naŋ.

¹⁵ Cinam salalay ati widi ngi bugawla ar guɗuk ngi mizli mijeŋŋehey: «Bumbulvuŋ a gi gwat madiɗahay le ti gidaŋ naŋ mihaɗa na!

¹⁶ Bumbulvuŋ a biga gidaŋ naŋ le! Bumbulvuŋ a gi gwat madiɗahay le ti gidaŋ naŋ mihaɗa na!»

¹⁷ Ĩˀĩ, y'anta muc ta, y'ada ti siifa, ɓa ngi slufa slra Bumbulvuŋ miga taŋ.

¹⁸ Bumbulvuŋ a kutiy kuti ngi bonoy le gisiŋ ɓula, amma a puliy ɓa i muc ta.

¹⁹ Wunikiy miviŋ ngi mizli mijeŋŋehey, ɓa i ci nga hunuma Bumbulvuŋ!

²⁰ Miviŋ ngi ci nga ciki Bumbulvuŋ i nah, anja mizli mijeŋŋehey a cam ti raˀaŋ.

²¹ Bumbulvuŋ ɗu, sey i hunumuw, asi ki kilo widi ɗu le, sey i hunumuw ti dimis, asi ka milihiy na.

²² Ɗugur, mindira hayay mihizigaka avra na, a tiri ɗugur mezle le ngi ji mivay.

²³ I Bumbulvuŋ miga kanah, avu ndra na, i gwat ngi pur hiri ngal ngal!

²⁴ Hana i hin Bumbulvuŋ miga: anja a ndir i hin ndra ngi cine ndum ati ngi ji salalay.

²⁵ Sawa Bumbulvuŋ ɗu, sawa, jina ndra! Bumbulvuŋ ɗu, sawa, jina ndra ɓa i lumam bugawla!

²⁶ Mbur macawa ng'aka ti slimiɗ ngi Bumbulvuŋ na, anja Bumbulvuŋ a ɗuwulaŋ mi! I ɗuwulukum mi ti slimiɗ ngi Bumbulvuŋ, zle tir hay naŋ.

²⁷ Bumbulvuŋ i Buymisemuŋ, ara pusluɗa ndra li minjahha: Cam hiɗim hiɗim, mihaŋ ngi widisey kaw kaw a haŋ, gunoko hirnga ngi li gi mikuli gun.

²⁸ Ki i Buymisemuŋ ɗu, sey i hunumuw, Buymisemuŋ ɗu, sey i zluzluɓ a mbuŋ ɗike.

²⁹ Hunumaka Bumbulvuŋ, asi naŋ mezleŋ, yo gi teŋteŋ naŋ na, naŋ da hã ngi sete.