DIMISEY 114 - Bible en langue guiziga

Israyeley muboko ti Ezipte

¹ Ti Israyeley muboko ti Ezipte, ti dideˀ ngi Zakopoy mupulaka mizli maɓam mi taŋ ta na,

² hirwuy Zuda a tiri hay ngi Bumbulvuŋ, yo Israyele kwana, a tiri li nga naŋ.

³ Mubuliy mupura Israyeley keɗ na, a wucuh wucah a mbuŋ taŋ, mizaw Zurdeŋ kwana, a kurus kuras nga dirba.

⁴ Muwãhay a zluzluɓam paŋ paŋ ka jagara tumuŋhoy, li ɗigaray a jiɗam ngbak ngbak ka ziri away.

⁵ Mubuliy, mulumuw i mi ɓa ki wucuh wucah naka? Na, ka mizaw Zurdeŋ, ki kurus kuras nga dirba vur mike?

⁶ Kum muwãhay, ki zluzluɓam paŋ paŋ ka jagara tumuŋhoy vur mike? Yo kum li ɗigaray, ki jiɗam ngbak ngbak ka ziri ˀaway vur mike?

⁷ Hirwuy, ka wus ngbaˀ ngbaˀ ti mumul a mbuŋ Buymisemuŋ, a mbuŋ Buymisemuŋ ngi Zakopo.

⁸ Naŋ, a mbiɗa mandazlay muwã, a tiri di yam miciɗak ciɗak, yo li ɗuguro, a tiri di miviɗiviɗi ngi yam.