DIMISEY 111 - Bible en langue guiziga

Wuluka gwat ngi zuma hirngahay Bumbulvuŋ miga taŋ

¹ Haleluya, I wuɗ i hunuma Bumbulvuŋ ar kus madiɗa, waɗ ar li ngilawuy ngi mizli mijeŋŋehey ti mevel ɗu wãˀ.

² Slra Bumbulvuŋ miga taŋ na, kay, i slra madiɗahay. Mizli mawuɗam slra tayna gar na, a dubunaka jileŋ naŋ.

³ Gwat naŋ miga gar na, a wucuɗ deŋ, yo gi jeŋŋe naŋ, naŋ da caˀa kine.

⁴ Cekenehey, naŋ miga taŋ na, a wuɗ le ɓa mizli a wulkaka taŋ keŋŋe. Bumbulvuŋ naŋ mezleŋ, yo a pur ircece haɗi.

⁵ Mbur mazluwun di na, ara vulaŋ gwat ngi zum, ara wuluk ndrehhe ar jumoˀay naŋ na.

⁶ Gidaŋ naŋ, naŋ magi di slra na, a biga le da mizli naŋhaya, ti naŋ muvula taŋ hirwuy ngi sukwi mekelemey ɓa a zumakaŋ.

⁷ Naŋ, a gi di i slra migisiŋ gisiŋhey, yo i slra mijeŋŋehey, ɓi naŋ mawuɗ cek na, i ɓi migisiŋ gisiŋhey,

⁸ t'anta mbiɗam ta ndiɗaˀ wãˀ, asi i ɓi mijeŋŋe, yo i ɓi mikaslslahay.

⁹ Bumbulvuŋ a slin, ɓa a pulaka mizli naŋhaya tir beke, a juw ɓi ngi jumoˀay le ngi set ati taŋ. Slimiɗ naŋ, naŋ pal, yo a gi zluwun da mburu.

¹⁰ Zli virzi ngi sinmijileŋ, i zluwun ti Bumbulvuŋ. Mizli magaka kanah gar na, i mizli misi ti siney gisiŋ. Mizli a hunumakaŋ ngi caˀ kine.