DIMISEY 109 - Bible en langue guiziga

Mbur mukupakaŋ ɓi le, mazila Buymisemuŋ, ɓa a kilo widi naŋ

¹ Dimis ngi wuzla dimis ngi Davitey. I mulumo di ar ɗerewol ngi buy dimis. Ka Buymisemuŋ ɗu, ya mahunumuw na, ki cifi teˀteˀ ta,

² asi mizli ara ɓikiy mi ngi sliŋ, ara gikiy gilaw, yo ara gam mbaɗa ar ya.

³ Gun hirnga ɗu gar na, sey a ɓikiy di i mi ngi gi mesene ti ya, yo a wuɗam gi vurum ti ya, manja ya migi gwata si.

⁴ Yi wuɗ taŋ ngi ngama, amma taŋ a jikiy ɓi jaka, dar yi dir dibiɗ vur taŋ.

⁵ A mikiy gi mezle ɗu ti malambaˀa, yi wuɗ taŋ ngi ngama, a mikiy di ti gi mesene.

⁶ Dar a ɓam vur ya: «Zuɓukum mbur ɓa a gilaŋ ɓi, anja mbur misi moˀore deŋ tir vay hazum naŋ.

⁷ Taŋ masa gakaŋ kiita na, anja kiita a jaŋ, anja diradibiɗ naŋ a tiri gi mungra,

⁸ anja a zik ar siifa haɗi ta, anja mbur mekelem a zuɓa slra naŋ,

⁹ anja ziri naŋhay a tiram mutuhu, anja ngwas naŋ a tiri wudiga,

¹⁰ anja ziri naŋhay a ram digi kiŋkiŋ lambaˀ ti suko gwat avu mizli, a ram ti suko gwata kileŋ avu diŋ taŋ.

¹¹ Anja mbur muvulaŋ duvus ngi hataka, a hila zlili naŋ slar slar wãˀ, anja mulakay a tiɓaka gwat naŋ maluma gar.

¹² Anja mbur magaŋ mezle, anta ko pal ta, yo anja mbur mapura ircece da mutuhu naŋhaya, anta ko pal ta.

¹³ Anja tizer naŋ a kiɗ hilfa wãˀ, angi tizer masa so ngi mbuŋ na, anja slimiɗ naŋ a bo anga mata wãˀ.

¹⁴ Mungra ngi dideˀ naŋhay na, anja a puɗukaka hiri naŋ da Bumbulvuŋ ava, mungra ngi mumuŋ miga na, anja gwat masusuyumo anta.

¹⁵ Anja gwat nah gar na, a ndir keŋŋe a hirnga Bumbulvuŋ, anja slimiɗ taŋ a susuyum wãˀ asi ruwuyo.

¹⁶ Asi mike na, mbur nah a wuluk neˀ le zleˀe ngi gi mezle ta, amma a sipa mbur misi murga nder nder, mbur migeˀ ircece, muvuso le muwãˀ naŋ na, hã a kiɗa vagay cummo.

¹⁷ A wuɗ di nga naŋ i nisa vu, dar nis a mo nga hirnga naŋ a muŋ, a ngum ɗuwula mi ta, dar ɗuwula mi anta ava ta ya.

¹⁸ A ka nise ɓim avu vu ka zana, joˀ nis tuwa, a ci yik yik ava kaɓa yam, yik yik ava kaɓa mal.

¹⁹ Anja nis a sirta sirit kaɓa zana, anja a ndir kaˀ avu vu kaɓa kanda.»

²⁰ Mizli makupikiy ɓi, yo maɓam ɓi malambaˀ ar ya na, Bumbulvuŋ a wurka taŋ kahana so.

²¹ Na, ka Bumbulvuŋ, Buymisemuŋ ɗu, gi gwat vur ya ar slimiɗ ɗike. Gi kaslsla ɗik i gwat mezle avu ya, ambuh lihiy.

²² Yi mbur misi murga, ya geˀ ircece, ar mebezleŋ ngi vu ɗu na, gwat ara giriy kuyta wãˀ.

²³ I ra kiɗ mi neˀneˀ kaɓa susuɗuk masusuyum, ara ɓulikiy kaɓa maɓulam jaray.

²⁴ I gi dalyam le haɗi, hã i cici deŋ gu mata, ya malum gwat ngi zum mata tuwa na, mindiriy i tesl sek tewle.

²⁵ Yi tiri gwat mukuy ta le wãˀ avu mizli makupikiy ɓi, taŋ mupurikiy le gar na, a hizigiɗam hirnga deŋ.

²⁶ Bumbulvuŋ, Buymisemuŋ ɗu, so jiniy, lihiy ti gi teŋteŋ ɗik na.

²⁷ Bumbulvuŋ, anja mizli tayna a sinaka, maga gwat i ka, i ka miga vur ya.

²⁸ Taŋ a nisam vu, amma ka, ki ɗuwul mi. Da a zlikiy le ngi kiɗa vu na, a pam mesem ngatara lambaˀ, amma ya gawla ɗike, i ra mumul.

²⁹ Mizli makupikiy ɓi na, anja busukum ngi vi dangwal taŋ a diɗi, yo anja mesem a sirta taŋ sirit wãˀ kaɓa godo.

³⁰ I wuɗ i hunuma Bumbulvuŋ ɗu ˀay paɗ a muŋ, i wuɗ i ɗuvaŋ hirnga a wuzla zigiduw.

³¹ Asi naŋ a ro deŋ tir vay hazum ngi mbur misi murga, ɓa a lahaŋ avu mizli magakaŋ kiita.