DIMISEY 105 - Bible en langue guiziga

Ɓi ngi gi teŋteŋ ngi Buymisemuŋ

¹ Hunumaka Bumbulvuŋ, tilam mi ti slimiɗ naŋ, slra madiɗahay, naŋ miga taŋ na, bigaka a wuzla mizli mekelemey.

² Hunumakaŋ ti dimis, kiɗakaŋ gwat ngi dunguroy, cekenehey, naŋ miga taŋ cek na, ɓaka ɓi nah ava.

³ Jijaham asi slimiɗ naŋ mipal na, yo kum mizli masipam Bumbulvuŋ na, mumulom.

⁴ A ram ti sipa Bumbulvuŋ, yo cufuɗam gidaŋ ava, sipakaŋ hirdam hirdam, ɓa ki ndiram a mihiri naŋ.

⁵ Cekenehey, naŋ miga taŋ, ati gwat migam ɗaˀ tahay, naŋ miga taŋ, waɗ gwat naŋ mujuwa taŋ a mevele ngi gi, naŋ miɓa ti balam naŋ na, wulkaka taŋ keŋ keŋ,

⁶ kum tizer ngi gawla naŋ Abraham, kum ziri ngi Zakopoy, naŋ muwunukum,

⁷ Bumbulvuŋ, Buymisemuŋ ndr'i naŋ, mawa hirwuy gar i naŋ.

⁸ Jumoˀay naŋ ati kum na, naŋ da ti naŋ keŋŋe a hirnga, i mingiɓi, naŋ muɗuva da dideˀ dideˀ durmuku.

⁹ I ɓi ngi jumoˀay naŋ ati Abraham, ɓi migisiŋ, naŋ miɓa da Izak ti hudum.

¹⁰ Jumoˀay nah na, a tiri di ɓimuɗuva da Zakop, i jumoˀay mandir ngi caˀa da Israyel,

¹¹ ti naŋ miɓi: «I vuluw hirwuy Kanaˀan da ka, i vulukum di i mi ngi kum!»

¹² Ti nah zleˀe na, dideˀ ndraˀahaya taŋ haɗi ta, i moholoyoy njiraˀ kini si.

¹³ A slikiɗam aka aka nga wuzla sukwi mekelemey, tir hirwuy ngi buy mekeleme ng'ar mekelem.

¹⁴ Amma Bumbulvuŋ a pula taŋ zlaɗ, ɓa mbur a guzuvura taŋ ta, a gi bonoy da buyoy le vur taŋ,

¹⁵ a ɓa taŋ: «Mizli ɗuwoy, ya muwuna taŋ na, ki wusaka taŋ ta, ki gaka malambaˀ da mijiviɗ ɗuwoyo ta.»

¹⁶ A so ti may asi ruwuyo, ko gwat ngi zum anta.

¹⁷ A slin ti mbur cici a mbuŋ, i Zozef mihiɗikaka ng'ar beke.

¹⁸ A cakaŋ dambla gizl a saraya, waɗ kulaˀ celelu asi ˀaya, kaˀ ti naŋ,

¹⁹ hã a ndila hin ngi mingiɓi ngi Zozef miɓa zleˀe tuwa, a gi gisiŋ muduba, mingiɓi ngi Bumbulvuŋ, a biga kpak ngi Zozefe le so.

²⁰ Buy Ezipte a ɓi ɓa a puskakaŋ, buy ngi mizli a ɓi ɓa a pulakaŋ.

²¹ Buy Ezipte a cufa Zozefe i buy ngi hay naŋ, yo mawa gwat naŋhay gar i naŋ ma,

²² ɓa a sirika madiɗa ngi slraˀahayaka naŋ mawuɗo, yo ɓa a vula sinmijileŋ da mizli micawwahaya.

²³ A dirba nah na, Israyel aru nga Ezipte, Zakop a slikiɗ nga ruwuy ngi Kam.

²⁴ Buymisemuŋ a ga ɓa mizli naŋhay a jam haɗa, yo ɓa a tiram gidaŋ haɗa fineˀ mesene taŋhaya.

²⁵ A mbiɗa mevel ngi Ezipteheye, a zlaka gi mesene ti mizli naŋhaya, a gaka gilaw da gawla naŋhaya.

²⁶ Buymisemuŋ a slin gawla naŋ Moyis nga Ezipte, waɗ Aroŋ, mbur naŋ muwunaŋ.

²⁷ A Ezipte a diga na, mingiɓi taŋ a gi gwat mabigi gwata, Buymisemuŋ a pula taŋ jiviɗ, a gam gwat migam ɗaˀ tahay a hirwuy ngi Kama.

²⁸ Buymisemuŋ a go luvuŋ, li a gi timbiɗim, amma ko mbur miɓi, naŋ kaslsla na, anta loŋ ta.

²⁹ A mbiɗa yamaya, a tiram pumbus, a ngizla kilif ngi raˀahaya cek.

³⁰ Hirwuy taŋ i gec pal naŋ heɓeheɓe, hã sesẽŋ ar viŋ ngi hay buyoy.

³¹ Bumbulvuŋ a ɓi ɗaˀ si na, birbirey a soko, yo hirwuyo gar i cunjuhoy giv giv.

³² Ar deɗe ngi vuŋ, a po taŋ yam, waɗ vuŋ a ndisl, a bul vu asi ruwuy taŋ njilim njilim.

³³ A hirya gudubun ati ˀuruf taŋhaya liɓasl liɓasl, yo a ngila widis ngi si ruwuy taŋhaya nguɓoc nguɓoc.

³⁴ Bumbulvuŋ a ɓi ɗaˀ ma na, jaray a ndilawa sirit sirit, waɗ ɓeɓeke slirɓiɓiɓi, a sluf ta.

³⁵ A zumaka gwat mutukuzo ngi si ruwuyo tirneˀ tirneˀ, gwat ngir guvahaya leɗeɗ.

³⁶ Buymisemuŋ a ngizla ziri mizile modogom ngi Ezipteheye pay, ziri, taŋ miyaka taŋ ngi gawla taŋ aruŋ.

³⁷ A bi ti mizli naŋhaya na, taŋ ti ɓiri bara ati ɓiri tapasl tapasl haɗi avu taŋ, taŋ gidaŋ gidaŋ.

³⁸ Israyeley macohom na, Eziptehey a mumulom haɗi, asi zluwun a ga taŋ le haɗi teˀe.

³⁹ Bumbulvuŋ a njir gazlavay misi ka mulbuɗ njar, ɓa ngi ɗumo taŋ avu Ezipteheye, yo ti duvuɗo, vu ara pusluɗa li a mbuŋ taŋ ciɗak ciɗak.

⁴⁰ Ngi pas numuŋ ada na, a cufuɗam gwat ngi zum, dar Buymisemuŋ a po taŋ sar ti tuɓurlay saɓalak, a mba taŋ ti ɗaf ngi muŋ.

⁴¹ A cira mandazlay muwã kpah, yam a bawa col col, a ɓul vilvil ka mizaw madiɗaŋ, puɗak a wuzlaɓuh mikirɗak kirɗaka.

⁴² Mingiɓi naŋ mipal, naŋ miɓa ɗaˀ le zleˀe da gawla naŋ Abraham na, naŋ da keŋŋe a hirnga naŋ.

⁴³ A bi ti mizli naŋhaya, a ram bal ti jiɗa mececẽleŋ, mizli naŋ muwuna taŋ, a ram bal ti ji salalay.

⁴⁴ A vula taŋ hirwuy ngi sukwi mekelemeye, a ciram tisi slra ngi mizli mekelemey migakaŋ,

⁴⁵ ɓa a jaka ɓimuɗuva naŋ na a hirnga, yo ɓa a sipaka ɓimujuwa naŋhaya. Haleluya!