DIMISEY 104 - Bible en langue guiziga

Sise da Buymisemuŋ migi gwatay

¹ Yawwa, i wuɗ i ga sise da Bumbulvuŋ ti membezleŋ ngi vu ɗu wãˀ! Bumbulvuŋ, Buymisemuŋ ɗu, ki madiɗa muwãˀ naŋ kpaka. Kuy ɗik ati wucuɗ ɗike, kayya, a zli ta wãˀ.

² Ki gijuwa li minjahha le gijaw gijaw avu vu kaɓa godo, ki njira muŋ njar kaɓa guɗuku.

³ Ki ɗiya hay ɗik a hirnga yamay, gazlavayaya, ki tiri taŋ mota ɗik ngi vurumoy, ki ru digi ar kirpasl ngi himiɗi.

⁴ Himiɗe, ki tiri di mislin ɗikey, yo irne vu, ki tiri di gawla ɗikey.

⁵ Ki ɗuva hirwuyo taˀ gidaŋ gidaŋ ar virzi naŋ, naŋ anta wus ta ndiɗaˀ wãˀ!

⁶ Ki sirta hirwuyo le sirit ti mubuliy kaɓa ti zana, hã yam a jiɗ sesẽŋ a hirnga muwãhay.

⁷ Ka mubuca yam ngir mubuliye le ɓar na, a kurus kurassa, naŋ micina ˀay ɗik misi ka ndisl ngi vuŋ na le cin na, a zliɗ hirnga bilyãˀ lambaˀ.

⁸ Yam a tuwuɗo tir muwãhaya, a pi sar ng'ar sozohoy, a ɓul ng'ar li ka mislaŋ di.

⁹ Ki slaŋ maakwaya le mbaŋŋa, ɓa a tuwuɗa ta, yam anta sa mawa ngi sirta hirwuyo mata.

¹⁰ Ki ka jiviɗ da miviɗiviɗi ngi yamaya ng'ar zlazlaray, a ɓulom baɗ tir wala muwãhaya.

¹¹ Gwat misãmi ngi ɓuhoy gar ara sam, yo ara kiɗa madalyam da zungu ngi ɓuhoyo.

¹² Ɗiyuwoy a ɗiyaka hay taŋhaya gweˀ gweˀ a cikeˀe, joˀ ar mihaŋ ngi widisey, dar a tuwam.

¹³ Ki go vuŋ paɗ ti muŋ ng'ar muwãhaya, hirwuy ara mbi ti gwat mezle ɗikeye.

¹⁴ Ki ra gila giziŋ da gineweye, ki ra ga gwat ngi migamay da mburo, ɓa hirwuy a baŋ ti gwat ngi zum naŋ,

¹⁵ mbaazla, ɓa puskaŋ vu, mal, ɓa a ndir ti cira hiri, yo ɗafa kwana, ɓa a vulaŋ gidaŋ.

¹⁶ Bumbulvuŋ, widis ɗikey ara mbam ti yam, i miter ngi Libaŋhay, ka minga taŋ na.

¹⁷ Ɗiyuwoy maɗiyam hay na ar taŋ, yo membesembese kwana, a ɗiya nga naŋ ar widis migidaŋ mimezle.

¹⁸ ˀAw muwãhaya, taŋ ar muwã musuburoy, yo kucumoyo, li ɗum nga taŋ a wala muwãhay.

¹⁹ Ki ga kiya na, ɓa ngi slufa hin ngi muguzlumoy, yo pasa kwana, a si na pas naŋ madiɗe le.

²⁰ Ka mugo luvuŋ le geˀ si na, duvuɗ a ji le timbiɗim, joˀ gwat misãmi ngi ɓuhoy, a ram ti liˀiwenewene.

²¹ Zir moboroyo, da ara sipam useˀ na, a tuwam, a cufuɗam gwat ngi zum taŋ avu ka Bumbulvuŋ.

²² Da pas a bo le na, a mam, ara hinam ar kuɓuŋ taŋhay a muŋ.

²³ Mburo kwana, a bi ng'ar slra naŋ, naŋ da ar li gi slra gǝr gǝr, hã pastaˀ!

²⁴ Bumbulvuŋ, ki gi gwatay le haɗi, ki ga taŋ cek ti sin ɗik mijileŋ, hirwuy a nih le ti gwatay ka miga taŋ na.

²⁵ Mubuliye n'ani, firndiw, ciɗak ciɗak, gwat misãmi memeɗe ati madiɗahay araŋ, wenewene, a slufam ta.

²⁶ Palalam madiɗahay maram, yo masoko gar na ti raŋ, waɗ gwat misãmi madiɗaka hurum, ka miga ngi gi dungur ti naŋ.

²⁷ Gwat tayna gar na, ara njaham hiri asi ka, ɓa ki vula taŋ gwat ngi zumo kasl kasl ar pas taŋ muwuɗam le gar.

²⁸ Daka mira vula taŋ di na, a tiɓakaŋ, da ka muwuna haŋ ɗike le baŋ na, a mbam pecek.

²⁹ Amma da ka muɗumo mihiri ɗike le na, a ndilam ɓaˀ ɓaˀ ti zluwuno, da ka misla taŋ musuwuno le na, a micam, a tiram murɓuk a muŋ.

³⁰ Daka mumo taŋ ti musuwuno le a muŋ na, a slikiɗam a muŋ ma, joˀ gwat ngi ruwuy gar a mbiɗi nawayaŋ.

³¹ Bumbulvuŋ, anja ki ndir ti dudok ɗike hã ngi sete, anja ki mumul asi slra ɗik, ka miga gar na Bumbulvuŋ.

³² Ka mupuro hirwuyo le keɗ na, a wus hiɓik hiɓik, ka muwusa muwãhaya le duk na, a ngisam deŋ.

³³ Angi ya misi ti siifa aruŋ gar na, i ra hunumuw ɗu Buymisemuŋ, angi hin ɗu mindir angi siifa na, i ra hunumuw Bumbulvuŋ ɗu.

³⁴ Anja mingiɓi ngi dimis ɗu, a cǝruw hiri, yo anja i mumul asi ka ki Bumbulvuŋ ɗu.

³⁵ Anja migi mungrahay a kiɗam hilfa kuɗup wãˀ asi ruwuyo, yo anja mizli malambaˀhaya anta mata. Yawwa, i wuɗ i ga sise da Bumbulvuŋ ti membezleŋ ngi vu ɗu wãˀ! Haleluya!