DIMISEY 103 - Bible en langue guiziga

I wuɗ i ga sise da Bumbulvuŋ

¹ Dimis ngi wuzla dimis ngi Davitey. Yawwa, i wuɗ i ga sise da Bumbulvuŋ ti mevel ɗu wãˀ, Buymisemuŋ mipal na, i wuɗ i gaŋ sise ti mevel purla.

² Yawwa, i wuɗ i ga sise da Bumbulvuŋ ti mevel ɗu wãˀ, gi mezle naŋ mihaɗa na, y'anta puyuk di hirnga ko pal ta.

³ Mapuliy mungra ɗuwoy wãˀ avra gar i naŋ, yo mambuliy tir jiji ɗuwoy gar i naŋ ma.

⁴ I naŋ mutuɓo siifa ɗu avu muco, ara giy mezle, yo ara wuɗiy haɗa teˀe.

⁵ A ra vuliy gidaŋ ar midigila ɗu, ara tiri ti ya midigiɗe midigiɗe, ya gidaŋ kaɓa mulu maslikiɗi.

⁶ Bumbulvuŋ a gi di i gwat mijeŋŋehey, mizli muguzuvurahay le gar na, a ga kiita taŋ ti jiviɗ naŋ kasl kasla.

⁷ Ɓi ngi sipi jiviɗ naŋ na, a njika le da Moyise, yo slra madiɗahay, naŋ miga taŋ na kwana, a biga le da Israyeleye.

⁸ Bumbulvuŋ a pur ircece, yo a gi mezle haɗi teˀe, a ji mevel kutum ta, yo naŋ teŋteŋ haɗa.

⁹ N'anta ndir ar li mbiɗa hirnga da mburo ta, yo naŋ anta ji mbur a kwacaya ngi wãˀ ta.

¹⁰ N'anta kuta ndra weˀe avu mungra ndrahay na ta, naŋ anta ma ndra malambaˀa weˀe avu malambaˀ ndrahay na ta.

¹¹ Mizli mazluwunam di na, naŋ teŋteŋ avu taŋ fineˀ hirngaŋ, kaɓa muŋ mifineˀ hirnga ngi ruwuy na ya.

¹² A zliɗa malambaˀ ndraˀahaya le kileŋ avu ndra, kaɓa si pas ngi miprik mikileŋ avu si pas ngi pastaˀ na ya.

¹³ Bumbulvuŋ a wuɗ mizli mazlunam di, kaɓa cine mawuɗ ziri naŋhay na ya.

¹⁴ A ga ndra ti gwat kahana kahana na, a si na le. Yo ndr'i murɓuk na, naŋ da ti naŋ keŋŋe a hirnga.

¹⁵ Hin ngi siifa ngi mburo, naŋ ka giziŋ, a fuyuk kaɓa giziŋ a ɓuh.

¹⁶ Da himiɗ mugo le na, giziŋ naŋ anta mata, ko li naŋ misi anga zleˀe kwana, anta sin mata.

¹⁷ Amma gi teŋteŋ ngi Bumbulvuŋ, naŋ da ar mizli mazlunam di, naŋ da zle misi ngadana ta, hã ngi samadin. Gi jeŋŋe naŋ na, naŋ da vur dideˀ vur dideˀ taŋhaya.

¹⁸ N'ada vur mizli majaka ɓi ngi jumoˀay naŋ a hirnga, yo vur mizli mawulkam ngi gi gwat naŋ miɓa ɗaˀ le na.

¹⁹ Bumbulvuŋ a ɗuva janga naŋ ngi buyo le a muŋ, yo ara zum buy a hirnga gwatay gar.

²⁰ Kum modro ngi Bumbulvuŋhoy, gakaŋ sise, gwat naŋ muɓukum di le na, ki ra gaka mbar vu wãˀ, yo naŋ miɓi le ɗaˀ si na, ki ra cinakaŋ mi.

²¹ Kum soje ngi Bumbulvuŋhoy, kum madiɗa ngi slra naŋhay magakaŋ gwat naŋ mawuɗ gar, gakaŋ sise.

²² Kum, Bumbulvuŋ mugukum gar, misi ar li naŋ miwa ko amaka gar na, gakaŋ sise. Yawwa! I wuɗ i ga sise da Bumbulvuŋ ti mevel ɗu wãˀ.