DIMISEY 101 - Bible en langue guiziga

Buy a vula vu naŋ le a mbuŋ Buymisemuŋ, ɓa a sipa gi gwat mikaslsla

¹ Dimis ngi wuzla dimis ngi Davitey. Gi gi teŋteŋ ati gi kaslsla na, i wuɗ i zli taŋ dimis, ɓa i hunumuw ti naŋ, Bumbulvuŋ.

² I wuɗ i sipa gi gwat misi ti jiviɗ naŋ ɗalla. Ki sa so ng'avi ya ti vunaka? I sa gi gwat mikaslsla ti mevel purla, avu mizli ngi hay ɗuwoyo.

³ Gi gwat maso ti hiryi gar na, y'anta sa hiyĩ ko pal ta. Ɓi ngi mizli mapulaka tiɓi a mevel na, anta sa ciy ya ko neˀ ta.

⁴ Gwat misi i nah ta na, i cici kileŋ ava, gi malambaˀa, y'anta i wuɗ cine ɓi nah ta.

⁵ Mbur mahul virzi da mizli na, i sa gicoŋ mi. Mbur mapura mizli mekelemey hiris le, yo mahuhum vu zlokoko gar na, yi ɓusa ɓi nah ta.

⁶ Mizli mezlehey minjah wãˀ ngi si ruwuyo, yi sa wini di i taŋ, ɓa a cifam a ciki ɗu. Mbur magi gwat ti jiviɗ naŋ ɗalla na, naŋ a sa tiri mbur madiɗa angi slra ɗu.

⁷ Mbur misina gi glaw haɗi da mizli na, naŋ anta sa cifi a hay ɗu ta. Mbur magi slir haɗa gar na, naŋ anta sa cici a mihiri ɗu ta.

⁸ Vur miprik gar na, i sa guco mi da misi moˀorehey gar misi asi ruwuyo. Migi malambaˀhay gar na, i sa ɓula taŋ cek cek avra tir walahay nga ya Bumbulvuŋ.