Ɗerewol ZAK 4 - Bible en langue guiziga

Ji ngama ti duniya

¹ Kiɗavu ati tiri ar wala kum na, a boko ti damaka? A boko tivi hiyĩ gwat kum muro ar li gi vurum a hur kum na takwa?

² Ki ra hĩyãm gwatay, amma ki lumam ta, dar ki kiɗam hirnga, waɗ ki gam suloŋ, amma ki ndilaka ta, dar ki tiram, ki kiɗam vu. Kum anta lumam gwat kum mawuɗama ta na, asi kum anta cufuɗam avu Buymisemuŋ ta.

³ Kum macufuɗam gwat, ki lumam ta na, asi ki cufuɗam ti mevel malambaˀa. Ki cufuɗam di i gwat macirukum hiri tewle.

⁴ Gwat sulomehey lambaˀ! Ji ngama ti duniya, i gi mesene ti Buymisemuŋ na, ki sinaka takwa? Mbur mawuɗ ji ngama ti duniya na, kite ara gi mesene ti Buymisemuŋ.

⁵ Malla Ɓimutoho maɓi: «Buymisemuŋ a wuɗ ˀUf naŋ misi a hur ndra suloŋ suloŋ» na, ki waka kaɓa i ɓi lambaˀ kwa mbrike?

⁶ Amma Buymisemuŋ ara ga ndra mezle haɗa ava ma jaka. Vurˀe, Ɓimutoho a ɓi na: «Buymisemuŋ a sli himaˀ avu mizli muhuhumvuhoyo, amma a ga mezle da mizli mahinam hirngahaya.»

⁷ Hinam hirnga a mbuŋ Buymisemuŋ so. Slam himaˀ avu Milyama, ɓa a kil kileŋ avu kumo.

⁸ Kiraham gweˀ ng'avu Buymisemuŋ, yo naŋ kwana, a sa kiroho ng'avu kum aya. Kum mizli magam mungrahay, bunaka haŋ kumoyo. Kum mizli miɓi mi cuw cuwoy, bunaka mevel kumoyo.

⁹ Likam, tuwam kaɗam kaɗam, wudam. Anja singir kumo, a tiri tuwuy, yo mumul kumo, a tiri likaɓi.

¹⁰ Hinam hirnga a mbuŋ Bumbulvuŋ, ɓa a sa gukum ɗongor.

Ki gam kiita da mbur ta

¹¹ Sukum ɗu misikristuhoy, ki cikislam ɓi ar cil kumo ta. Mbur macikisl ɓi ar sukum naŋ, yo magaŋ kiita na, kite a cikisl di i ɓi ar ɓimujuwa, yo kite a gi di i kiita da ɓimujuwa. Amma da ki ra gam kiita da ɓimujuwa na, mbiɗeˀvra, ki ra gi ka migi kiita, k'anta sipa ɓimujuwa na mata.

¹² Maɗuva ɓi, yo magi kiita, i Buymisemuŋ pal naŋ tewle. Malih vu, yo mazizi vu gu ma na, i naŋ pal naŋ. Ka mbur maga kiita da mbur cil ɗik na, ki pura vu ɗike ka waka?

Ki huhumom vu ta

¹³ Cinam, kum mizli maɓam: «Dana, malla tiprik na, i sa ram ng'ar walahay madiɗa kini ti kaha, i sa vam a diga, i sa gam terere ɓa i lumam dala» na,

¹⁴ ki sinaka gwat masa gi tiprike le kwa? Ki sinaka ɓi ngi siifa kumo ta, asi kum kaɓa mulbuɗ mangisi, zik neˀ na, a susuyum le.

¹⁵ Anja zuwen ki ɓam na: «Da Bumbulvuŋ a ngum le na, i sa ndiram ti siifa, i sa gam gwat hana malla hana.»

¹⁶ Amma wurenna, ki ra jijaham, ki ra huhumom vu. Sukwi ngi jijih misi kanah gar na, naŋ kuy ta.

¹⁷ Mbur misina gi mezle le, amma da naŋ anta ga ta na, a gi di i mungra.