Ɗerewol TIT 3 - Bible en langue guiziga

Gwat ngi gi ngi mbur misikristu

¹ Mahiri ngi ɓi hana da mizli gar, sey a hinam hirnga a mbuŋ mizli miwi hirwuyoy, waɗ a mbuŋ mizli madiɗahay. Sey a cinaka taŋ mi, yo anja a juwam vu ngi gi gwat mezle ko wanaka gar.

² Anja a zam mbur ta, a tiram ta, a bigaka vu taŋ, taŋ ti mevel mezleŋ, i mizli miteˀteˀhey ndrehhe avu mizli gar.

³ Asi ndra vuna zleˀe kwana, ndr'anta ti lesl ta, i slikiɗam ɓi, i zizam le, ndr'i beke ngi may gwat wal wal waɗ ngi gwat macira hiri dumvu gar. Ndra zleˀe ti moˀore a kwacay waɗ may gwat, mizli mihimaˀhay, i hirsam vu ar wala ndra.

⁴ Amma ti Milih ndra Buymisemuŋ mubugo gimezle naŋ ati wuɗa mizli gar na,

⁵ a laha ndra le, anta asi i gam gwat mijeŋŋe le ti haŋ ndra ta, amma asi naŋ mapura ndra ˀircece tewle. A laha ndra ti taŋ mubunam ndra, ɓa ngi ya ndra sar mucuw naŋ, yo waɗ tisi ˀUf Mipal matiri ti ndra mizli nawayahay na.

⁶ ˀUf naŋ nah na, a ˀufo ndra di sirit hirnga ndra wãˀ, tisi Milih ndra Yesu Kristu,

⁷ ɓa gimezle naŋ na, a ɗiya ndra jeŋŋe a mbuŋ Buymisemuŋ, ɓa i lumam siifa ngi sete, ndra minjah hiri aseˀe tuwa.

⁸ Ɓi hana a ndila le ngi tiɓi njah wãˀ. I wuɗ na, ɓa ki ki slimiɗ kuy kuy wãˀ ar ɓi hana, ɓa mizli mitiɓaka Buymisemuŋ le na, a hurdumom ngi gi gwat mezlehey gar. Gwat mezle mapul gir da mizli, i nah.

⁹ Amma sipi ɓi lambaˀhay, slufa dideˀhey: mana a yi mana, mana a yi mana, tiri, ngila mi asi ɓi ngi tiɓi gar na, pula ɓi nah. I ɓi ngatara lambaˀ, ko anta jini vu neˀ ta wãˀ.

¹⁰ Mbur maga ɓa mitiɓihey a wunkam ˀay na, ɓaŋ sar pal, malla sar cuw na, ki baˀa baˀ murvay.

¹¹ Ki si na le, mbur misi kanah na, a ngizli le avu jiviɗ mijeŋŋe, ara gi mungra. A ra ga kiita da hirnga naŋ tehhe a muŋ.

Kuti ngi dirba wãˀ

¹² Da ti ya misa slunuw Artemas, malla Tisike le na, tum vu tum ɓa ki so lumiy a Nikopolis. Asi mike na, i juwa le a mevel ɗu, ɓa i ra tika kiya ngi himiɗ a diga.

¹³ Ki slimiɗ kuy kuy ngi jina Zenas, mbur migi kiita, waɗ Apolos, ar zuɓa mulak taŋ na, ɓa anja gwat a kica taŋ neˀ ta.

¹⁴ Sey mizli ndraˀahaya kwana, a dubunaka gi gwat mezle ti jiviɗ naŋ kuy kuy, ɓa a jinaka mizli ar gwat taŋ mawuɗam gurjike. Kahana na, naɓa a ndiram joˀ joˀ ngatara ta.

¹⁵ Mizli misi ati ya aka gar, a jukuw haŋ le. Ngama ndra mitiɓihey na, ja taŋ haŋ. Anja Buymisemuŋ a gukum mezle, gar kumo.